Afmælisgjöfinni skilað: Vaknaði timbraður við gleðiöskur sonarins

Jóhann Haukur Gunnarsson brosir hringinn þessa dagana eftir að tveir ungir menn skiluðu honum drónanum hans sem Jóhann hafði tapað á sjálfan afmælisdaginn.

Mennirnir höfðu þá nálgast myndefni úr myndavél drónans sem þeir notuðu til að hafa upp á Jóhanni en létu sig hverfa áður en honum gafst tækifæri á að þakka þeim fyrir. Þeir hafi þó tekið mynd af sér með drónanum og hengt aftan við myndefnið sem Jóhann deildi á netinu svo hafa mætti upp á þeim fundvísu.

Jóhann segist hafa fengið drónann í afmælisgjöf frá konu sinni og barni en í sjálfri jómfrúarferðinni hafi hann misst stjórn á tækinu svo það flaug úr augsýn og týndist.

„Ég hafði sett hann á stillingu sem ég réði ekkert við og hann rauk því miklu hraðar upp en ég átt von á. Ég rétt náði að sveigja fram hjá trénu í garðinum áður en hann hélt áfram að rísa upp á fullri ferð. Hann hefur eflaust verið kominn hátt í hundrað metra upp í loftið áður en ég missti algjörlega sjónar af honum,“ segir Jóhann.

Til allrar hamingju hafi hann kveikt á myndavél drónans – „það væri nú betra að hafa hana í gangi ef eitthvað skyldi koma upp á,“ segir Jóhann en myndband af svaðilförinni má sjá hér að neðan. Lagið sem heyrist í myndbandinu samdi Jóhann.

Eftir ítrekaðar en árangurslitar leitargöngur um Fossvoginn hafi hann þó gefið upp alla von um að nálgast hann aftur.

Jafet Bjarkar Björnsson, annar mannanna sem fann drónann, segir að þeir hafi gengið fram á drónann þar sem hann lá fyrir framan innganginn á íbúð þeirra í Fossvoginum. Myndefnið sem finna mátti á minniskorti drónans hafi þeir svo borið saman við loftmyndir á ja.is til að finna út hvar eigandi tækisins væri til húsa.

Þar hafi eiginkona Jóhanns komið til dyra en þegar hún hugðist sækja eiginmanninn svo hann gæti þakkað mönnnum fyrir að koma drónanum aftur í réttar hendur voru þeir á bak og burt.

„Þegar ég vaknaði timbraður eftir partýstand næturinnar við gleðiöskur sonar míns og áttaði mig á því hvað væri að eiga sér stað rauk ég niður en þá voru þeir horfnir,“ segir Jóhann og bætir við að hann vilji koma þakklætisvotti til mannanna. Hann eigi enn töluvert magn af bjór eftir afmælisveisluna sem hann vill endilega fá að deila með þeim.

Jafet segir að þeir félagar íhugi nú boð Jóhanns, þó svo að þeir þurfi engar frekari þakkir.