Skuldir íslenskra heimila lækkað hraðar en í flestum nágrannalöndum

Skuldir heimilanna eru nú jafnar því sem þær voru árið 2004 sem hlutfall af vergri landsframleiðslu. Þetta kemur fram í tilkynningu frá Fjármála og efnahagsráðuneytinu.

Íbúðaskuldir hafa lækkað úr 72% í 65% af VLF frá gildistöku skuldaaðgerða og áhrifa þeirra mun gæta áfram til frekari lækkunar. Í tilkynningunni segir að skuldir heimilanna lækki hraðar á Íslandi en í nágrannalöndum.

Þá hefur kaupmáttur launa aukist um átta prósent frá ársbyrjun 2013, sem hefur hjálpað almenningi til við að greiða niður skuldir.

Í árslok 2014 voru heildarskuldir heimilanna um 90,5% af VLF og höfðu lækkað um 10 prósentustig á árinu 2014. Íbúðaskuldir voru 68% af VLF í árslok 2014. Um mitt ár 2014 þegar skuldalækkunarúrræði ríkisstjórnarinnar tóku gildi voru íbúðaskuldir 72% af VLF. Í lok febrúar 2015 voru íbúðaskuldir 65% af VLF.

Í tilkynningu ráðuneytisins kemur fram að frá áramótum sé búið að greiða liðlega 51 milljarða vegna höfuðstólslækkunarinnar sem séu 75% af heildarfjárhæð niðurfærslunnar.

„Síðasti fjórðungur hennar verður greiddur inn á höfuðstól lána í ársbyrjun 2016. Við þetta bætast verulegar fjárhæðir sem heimilin geta greitt inn á húsnæðislán sín, eða sparað til fyrstu kaupa, skattfrjálst í hverjum mánuði. Aðgerða stjórnvalda til skuldalækkunar heimila skipta því sköpum við að bæta fjárhagsstöðu heimilanna og munu skuldir heimilanna lækka enn frekar þegar heildaráhrif aðgerðanna verða að fullu komin fram um mitt ár 2017.“

Skuldir heimila hafa lækkað mun hraðar hér en í flestum nágrannalöndum okkar á undanförnu árum.