Sigmundur ræddi stöðu smáríkja í Sviss

Sigmundur Davíð Gunnlaugsson forsætisráðherra tók í dag þátt í pallborðsumræðum um stöðu smáríkja í heiminum á ráðstefnu í St. Gallen háskóla í Sviss. Með honum í pallborði voru forsætisráðherra Möltu, utanríkisráðherra Gana og ríkisstjóri Delaware-fylkis í Bandaríkjunum.

Í máli forsætisráðherra kom meðal annars fram að staða smáríkja í samfélagi þjóða væri sterk og þau gætu byggt á sérstöðu sinni og sveigjanleika til að koma góðum málum til leiða.

Þá flutti Sigmundur einnig ræðu um stöðu Íslands á norðurslóðum og tók í framhaldinu þátt í umfræðum við áhorfendur úr sal og stjórnanda umræðunnar, Stephen Sackur, þáttastjórnanda á BBC sjónvarpsstöðinni. Hann sagði stöðu Íslands á norðurslóðum sterka og ræddi mikilvægi þess að þróunin á norðurslóðum verði sjálfbær og íbúum norðurskautsins til hagsbóta.

Jafnframt voru rædd samskipti Íslands og Sviss, málefni EFTA, Evrípumál og staðan í Úkraínu.

Á morgun mun forsætisráðherra heimsækja Liechtenstein og eiga fundi með forsætisráðherra landsins, þar sem málefni EES-samningsins verða ofarlega á baugi. Ennfremur mun forsætisráðherra eiga fundi með krónprinsi Liechtenstein og forseta þingsins.

Ræðu forsætisráðherra má lesa hér.