Heyrðu nýja lagið frá Sölku Sól og Gnúsa Yones

Hér er komið nýtt lag sem nefnist Það sem skiptir mestu máli og er samið af Sölku Sól og Gnúsa Yones í Amabadama. Lagið er samið í tilefni af Barnamenningarhátíð í Reykjavík sem hefst á þriðjudaginn í næstu viku og eiga allir fjórðu bekkingar í grunnskólum Reykjavíkur hlutdeilt í laginu.

Börnin fengu fræðslu í tengslum við 100 ára kosningaafmæli kvenna um mikilvægi þess að allir fái að segja sína skoðun og hafa áhrif á samfélagið. Var markmiðið að vekja börnin til umhugsnunar um stöðu jafnréttismála þá og nú og hvetja þau til gagnrýnnar hugsunar og þjálfa þau í að hafa áhrif á líf sitt og umhverfi. Þau unnu í hópavinnu og kusu svo þau réttindi sem þeim fannst mikilvægust. Sömdu þau Salka Sól og Gnúsi síðan texta upp úr þessum réttindaóskum. Amabadama mun flytja lagið í Eldborg á opnunarathöfn Barnamenningarhátíðar 21. apríl þar sem öllum fjórðu bekkingum í Reykjavík er boðið og taka þau þátt í flutningnum.

Barnamenningarhátíð í Reykjavík er fyrir börn og unglinga frá 2 ára til 16 ára með um 120 viðburði fyrir alla aldurshópa. Hún er haldin 21. – 26. apríl í næstu viku.

Hægt er að kynna sér dagskrána á www.barnamenningarhatid.is.

"Það sem skiptir mestu máli" - Lag Barnamenningarhátíðar Reykjavíkur 2015 from SFS Myndband on Vimeo.