Þarf að yfirgefa landið á næstu 30 dögum

Þrír lögregluþjónar komu heim til Amöndu Wood í kvöld og afhentu henni bréf þar sem henni er tilkynnt að hún hafi 30 daga til að yfirgefa Ísland.

„Í bréfinu segir að ef ég fari ekki úr landi á næstu 30 dögum að þá verði mér fylgt úr landi. Þá má ég heldur ekki koma aftur til Íslands næstu tvö árin,“ segir Amanda í samtali við Vísi.

Vísir sagði fyrr í dag frá máli Amöndu. Hún er bandarísk en giftist íslenskum manni árið 2011 sem hóf að beita hana ofbeldi stuttu eftir brúðkaupið að hennar sögn.

Þau bjuggu í Noregi í um eitt ár áður en þau fluttu aftur til Íslands árið 2012. Þá kom í ljós að eiginmaður Amöndu var ekki skráður til heimilis hér á landi og hún gat því ekki skráð sig löglega sem íbúi hér.

Sumarið 2013 skildi Amanda við manninn auk þess sem hún kærði hann til lögreglu vegna ofbeldisins sem hann á að hafa beitt hana á meðan þau voru gift. Hún sótti einnig um dvalar-og atvinnuleyfi hér og útvegaði alla nauðsynlega pappíra til þess en henni hafði meðal annars verið boðið starf.

Útlendingastofnun synjaði Amöndu hins vegar um atvinnu-og dvalarleyfi á grundvelli þess að hún hefur ekki næg tengsl við landið. Hér á hún fjölda vina sem hafa stutt við bakið á henni. Þá á hún einnig kærasta.

Amanda kærði úrskurð Útlendingastofnunar til innanríkisráðuneytisins en ráðuneytið staðfesti það að henni skyldi vísað úr landi.