Egill dreginn sundur og saman í nöpru háði

Hannes Hólmsteinn Gissurarson prófessor, vekur sérstaka athygli á Staksteinum dagsins í dag, sem hann segir Davíð Oddsson skrifa, í nýjum bloggpistli sínum: „Davíð Oddsson ritstjóri gerir síðan gys að Agli í Staksteinum dagsins í dag,“ skrifar Hannes Hólmsteinn, ánægður með sinn mann.  En til umfjöllunar er Egill Helgason sjónvarpsmaður.

Í Staksteinum segir meðal annars: „Eftir síðasta Reykjavíkurbréf tekur Egill kollhnís, sem eru töluverð viðbrögð af hans hálfu. Eyjan fullyrðir að á Fésbók skrifi Egill að Reykjavíkurbréfið sé „sprenghlægilegt“ og „þvílík misnotkun á einu dagblaði!“ [...]Það bætir ekki úr skák að þessi óhugnanlegi atburður átti sér stað „Við Reykjavíkurtjörn“ og margir vita hvaða fól orti það. Góðviljaðir menn hljóta því að fordæma þessa hótun um viðvarandi ofsóknarskort, sem virðist hafa verið staðið við, sem undirstrikar bara óþverraskapinn. Menn ættu að senda Agli blóm til huggunar, þó ekki fleiri stjúpur.“

Þarna er fast skotið en stjúpmóðir Egils var í eina tíð Sigrún Davíðsdóttir pistlahöfundur RÚV ohf, þannig að þarna eru slegnar tvær flugur í einu höggi, að mati þeirra Hannesar og Davíðs.

Hannes greinir frá því að hann, Ragnar Önundarson og fleiri menn hafi verið að ræða málin á Facebook, í rólegheitum, þegar skyndilega gall í Agli að Reykjavíkurbréfið, þar sem Davíð gerir grein fyrir afdrifaríku láni Seðlabankans til Kaupþings, að það sé „sprenghlægilegt“ og Morgunblaðið misnotað“.

Hannes Hólmsteinn segist hafa bent Agli á að sjálfur þætti hann nú ekki alltaf „óhlutdrægur sem umræðustjóri Ríkisútvarpsins, en sá er munur á þeim fjölmiðli og einkamiðlum, að okkur er öllum gert að greiða til hans. Ég get ekki sagt Agli upp, þótt ég geti sagt Davíð upp.“

Aftur gellur í Agli, að sögn Hannesar, að „ég hefði eitt sinn hótað sér við Reykjavíkurtjörn að ofsækja sig ekki. Væru að því vitni.“

Og sú hótun þykir Hannesi Hólmsteini og Davíð fyndin; víst er að þeim þykir Egill ekki merkilegur pappír og af ýmsu er að taka í væringum milli þeirra og Egils.