Vill aukið eftirlit með kynferðisbrotamönnum

Forstjóri Barnaverndarstofu vill að löggjafinn veiti auknar heimildir svo hægt sé að fylgjast með dæmdum kynferðisbrotamönnum eftir að þeir hafa lokið afplánun. Aðstoðarlögreglustjóri á höfuðborgarsvæðinu segir eðlilegt að dómum fylgi heimild til að sinna eftirliti með viðkomandi í nokkur ár.

Ekki er heimild í lögum í dag til að fylgjast með dæmdum kynferðisbrotamönnum eftir að þeir hafa lokið afplánun, hvorki af Barnaverndarstofa né lögreglu.

„Við vitum að hluti þessara einstaklinga er mjög hættulegur vegna þess að þeim er ekki sjálfrátt. Að minnsta kosti þurfa þeir aðstoð til að halda aftur af þessum hvötum sínum og partur af þessu er að veita þeim strangt aðhald og eftirlit,“ segir Bragi Guðbrandsson, forstjóri Barnaverndarstofu.

Ekkert í lögunum í dag styður hinsvegar slíkar aðgerðir.

„Lögreglan getur ekki fylgst með fólki nema við höfum fengið tilefni til þess að ætla að viðkomandi sé að fara að fremja brot eða búinn að fremja brot,“ segir Jón H. B. Snorrason, aðstoðarlögreglustjóri og saksóknari.

Jón segir að ef heimild fyrir áðurnefndu eftirliti yrði gefin gæti hún falist í því að fylgjast með hátterni viðkomandi einstaklings, það er, hvort hann sé í óreglu, hvort hann umgangist aðra dæmda kynferðisbrotamenn og hvort taki að sér störf með börnum eða unglingum svo eitthvað sé nefnt.

„Ég held að það væri langeðlilegast að það væri bundið í dómi yfir slíkum brotamönnum að eftir að þeir hafa lokið afplánun að þá þurfi þeir að sætta sig við eftirlit í einhver ár.“

Bragi segir að Bretar séu með í gildi slíkt kerfi en þar eru kynferðisbrotamenn teknir í sálfræðipróf og í kjölfarið metið hversu hættulegir þeir eru umhverfi sínu.

„Þetta eru að sjálfsögðu mjög viðkvæm mál og auðvitað megum við ekki stíga nein skref sem torveldar fólki við að snúa við blaðinu og hefja nýtt líf og hverfa frá háttsemi af þessu tagi. En við verðum líka að vera raunsæ. Við megum aldrei víkja frá okkar grundvallarmarkmiði, að treysta öryggi barnanna eins og við getum,“ segir Bragi.