Seinheppnir innbrotsþjófar í Grafarholti urðu bensínlausir í Kópavogi

Lögreglan á höfuðborgarsvæðinu virðist hafa verið fljót að upplýsa innbrot í búninga- og skrifstofuaðstöðu íþróttafélagsins Fram í Grafarholti í morgun. Rúmum þremur klukkustundum síðar voru tveir handteknir á stærðarinnar pallbíl vegna málsins. Reyndist pallbíllinn einnig stolinn.

Jóhanna Halldórsdóttir, rekstrarstjóri íþróttahúss Fram í Safamýri, segir að boð hafi borist frá Öryggismiðstöðinni upp úr klukkan átta í morgun um innbrot í húsnæði Fram í Grafarholti. Svo heppilega vill til að hún býr á sömu slóðum og var fljót á staðinn. Innbrotsþjófarnir voru á bak og burt en traustur nágranni hafði orðið vitni að stórum svörtum og ljóslausum pallbíl bruna í burtu skömmu fyrr.

„Þeir brutu og skemmdu en ég held að þeir hafi ekki stolið miklu enda ekki mikil verðmæti að finna þarna,“ segir Jóhanna. Hún var hæstánægð að lögreglunni hafði tekist að klófesta innbrotsþjófana en það fékk blaðamaður staðfest hjá lögreglu rétt fyrir tólf.

Voru á stolnum bíl

Ásgeir Þór Ásgeirsson, yfirlögregluþjónn hjá lögreglunni í Kópavogi, segir að ábending hafi borist um svipaðan bíl nærri Smáralind í Kópavogi fyrir hádegi. Ekki hafi verið um eftirför að ræða heldur hafi lögregla leitað bílsins. Svo heppilega vildi til að pallbíllinn varð bensínlaus í þann mynd sem lögregla hafði uppi á honum. Í ljós kom að bíllinn var einnig stolinn.

Verið var að leiða mennina tvo inn í fangaklefann þegar blaðamaður náði tali af lögreglu. Sagðist Ásgeir telja yfirgnæfandi líkur á að um sama bíl var að ræða og notaður var í innbrotinu í morgun. Nú yrði farið í að hafa uppi á eiganda bílsins en hann hefur ekki verið tilkynntur stolinn.

Jóhanna segir að ekki sé um einsdæmi í Grafarholti að ræða því undanfarið hafi borið á endurteknum innbrotum í hverfinu í Dalskóla.