Hafnfirsk fyrirtæki tvírukkuð um lóðagjöld í nokkur ár

Hafnfirsk fyrirtæki hafa verið tvírukkuð um lóðagjöld í nokkur ár. Við nýlegar kerfisbreytingar hjá bænum kom í ljós að skráning tólf lóða í eigu Hafnarfjarðarhafnar hefur verið röng og leitt til þess að lóðarleigan var tvíinnheimt. Þetta kemur fram í frétt á vef Hafnarfjarðarbæjar.

Þar segir að Hafnarfjarðarkaupstaður hafi innheimt lóðarleigu samkvæmt gjaldskrá en einnig Hafnarfjarðarhöfn. Segir að leiðréttingin sé að mestu vegna tveggja síðustu ára en nær þó lengra aftur í tímann. Eigendum lóðanna hafi nú verið sent bréf  og í framhaldinu verði ofrukkuð gjöld endurgreidd. Upphæðin sem um ræðir nemur alls 15,5 milljónum króna.

Haraldur L. Haraldsson, bæjarstjóri Hafnarfjarðar, biðst velvirðingar á málinu. Nú þegar sé búið að bregðast við og leiðrétta álagningu lóðanna vegna 2015 auk þess sem skráning verði leiðrétt hjá fasteignaskrá.

Upp hafi komist um mistökin um áramótin þegar sú breyting var gerð að bæjarsjóður Hafnarfjarðarkaupstaðar tók að sér að annast bókhald og fjárreiður Hafnarfjarðarhafnar sem felur meðal annars í sér innheimtu lóða- og fasteignagjalda fyrir Hafnarfjarðarhöfn.

„Markmiðið með breytingunni var að allar stofnanir bæjarins væru í sama bókhaldskerfi og að sömu ferlar væru notaðir þegar kemur að bókhaldi bæjarins,“ segir í frétt sveitarfélagsins.