Ásta ráðin í starf erindreka

Ásta Guðrún Beck hefur verið ráðin í nýtt starf erindreka á skrifstofu borgarstjóra og borgarritara. Hún mun meðal annars vinna með nýskipuðu stjórnkerfis- og lýðræðisráði með auknu gagnsæi og samráði í samskiptum við íbúa og sinna lögfræðilegum málefnum. Hún hefur störf 1. febrúar. Þetta kemur fram í tilkynningu frá Reykjavíkurborg.

Ásta Guðrún lauk embættisprófi í lögfræði (cand.jur) frá Háskóla Íslands árið 1998 og diplómaprófi í hagnýtri fjölmiðlun frá Háskóla Íslands árið 2003. Hún hefur síðastliðin þrettán ár unnið innan opinberrar stjórnsýslu, lengst af sem lögfræðingur hjá Þjóðskrá Íslands.

Ásta Guðrún hefur í störfum sínum sinnt verkefnastjórnun, gæðamálum, hönnun og þróun upplýsingakerfa og lögfræðilegri ráðgjöf. Hún hefur einnig unnið að upplýsingaöryggi og persónuvernd.