West Ham þurfti að hafa fyrir hlutunum gegn Bristol City

West Ham komst í dag í 5. umferð ensku bikarkeppninnar eftir 0-1 sigur á C-deildarliði Bristol City á útivelli.

Heimamenn byrjuðu leikinn betur og leikmenn West Ham björguðu tvívegis á línu í fyrri hálfleik.

Matt Smith fékk svo gott tækifæri til að koma Bristol yfir um miðjan seinni hálfleik en skallaði yfir.

Diafra Sakho kom inn í liði West Ham á 57. mínútu fyrir Enner Valencia og hann átti eftir að reynast örlagavaldurinn í leiknum.

Sakho skaut í slána á 74. mínútu og sjö mínútum síðar skoraði hann eina mark leiksins með skalla eftir fyrirgjöf Andys Carroll.

West Ham er því komið áfram en Bristol situr eftir með sárt ennið.