Seltjarnarnesbær greiðir starfsmanni þrjár milljónir vegna ólögmætrar uppsagnar

Hæstiréttur staðfesti í dag dóm Héraðsdóms Reykjavíkur í máli fyrrum deildarstjóra í launadeild fjárhags- og stjórnsýslusviðs Seltjarnarnesbæjar gegn bæjarfélaginu.

Konunni var sagt upp starfi sínu sem deildarstjóri vegna endurskipulagningar á starfsemi sviðsins. Hún höfðaði í kjölfarið mál til heimtu bóta vegna ætlaðrar ólögmætrar uppsagnar.

Talið var að þótt ákvörðun um fækkun starfsmanna í hagræðingarskyni réðist að meginstefnu af mati Seltjarnarnesbæjar þyrfti slík ákvörðun að vera í samræmi við grunnreglur stjórnsýsluréttar og byggja á málefnalegum sjónarmiðum.

Héraðsdómur dæmdi svo að bærinn þyrfti að greiða konunni tvær og hálfa milljón krónur ásamt vöxtum. Einnig þarf Seltjarnarnesbær að greiða henni 500.000 krónur vegna málskostnaðar.