Bíll fór út í Reykjavíkurhöfn

Mikill viðbúnaður var við Reykjavíkurhöfn, þar sem bíll fór út í höfnina fyrir rétt fyrir klukkan 17 í dag. Ökumanninum var bjargað úr sjónum og fljótlega kom í ljós að ekki voru fleiri farþegar í bílnum.

Hér að neðan má lesa hvernig atburðarrásin var eftir slysið:

Samkvæmt sjónarvotti eru nokkrir lögreglubílar á svæðinu, kafarar og sjúkrabílar ásamt leitunartækjum. Gestir á veitingastaðnum Höfninni urðu varir við það þegar bifreiðin skall í sjóinn. Maðurinn er talinn hafa verið lengi ofan í sjónum eða allt að hálftíma.

Lögreglumaður á vettvangi sagði í samtali við fréttamann að ekki væri vitað hvort maðurinn hefði verið einn í bílnum. Vettvangi hefur verið lokað og unnið að því að draga bílinn upp úr höfninni. Sjónarvottar sögðu skott bílsins hafa verið opið þegar bíllinn keyrði fram af brúninni.

Uppfært klukkan 17:45 - Kafarar hafa fundið bílinn en ekki er ljóst að svo stöddu hvort fleiri farþegar hafi verið í bílnum.  Lögregla og kafarar eru að leita í og við höfnina til að komast til botns í því hvort fleiri farþegar hafi verið í bílnum.

Uppfært klukkan 18:50 - Óskar Þór Ámundason þjónn á Höfninni sagði að gestur á efri hæð veitingahússins hefði séð jepplinginn fara fram af bryggjunni og lenda í sjónum. Þeir hringdu strax í neyðarlínuna og gerðu viðvart.

Skottlokið var opið á bílnum þegar hann fór fram af að sögn sjónarvottarins.

Bifreiðin er enn í sjónum en lögregla útilokaði ekki að fleiri kunni að hafa verið í bifreiðinni þegar slysið varð enda voru bæði dyrnar ökumannsmegin og farþegamegin opnar þegar að var komið.

Pétur Guðmundsson aðgerðastjóri hjá lögreglu sagði skömmu fyrir sex að leit yrði haldið eitthvað áfram en bifreiðin yrði líklega dregin upp í kvöld.

Uppfært klukkan 19:05 - Fram kom í kvöldfréttum RÚV að lögreglan væri búin að leita af sér allan grun um að fleiri aðilar hefðu verið inni í bílnum og því er talið fullvíst að aðeins sé um eina manneskju að ræða. 

Uppfært klukkan 19:35 - Lögreglan hefur sent frá sér tilkynningu um málið sem má lesa hér: Um hálffimmleytið í dag barst lögreglu tilkynning um að bifreið hefði hafnað í Reykjavíkurhöfn, en óljóst var í upphafi hversu margir voru í bílnum.

Fjölmennt lið lögreglu og björgunarfólks, þar á meðal kafarar, fór strax á staðinn og hóf leit. Kona fannst í sjónum og var hún flutt á sjúkrahús. Ekki er talið að fleiri hafi verið í bílnum og er aðgerðum á vettvangi að ljúka.