Launafólk getur ekki búist við jafn miklum launahækkunum og læknar

Launafólk getur ekki búist við jafn ríkulegum launahækkunum og læknar í komandi kjarasamningum. Þetta segir forsætisráðherra en hann undirritaði yfirlýsingu í dag um að ráðast í stórfellt átak í uppbyggingu heilbrigðisþjónustu á Íslandi.

Undirritunin er í framhaldi af gerð nýrra kjarasamninga lækna og ríkisins. „ Þessi yfirlýsing er staðfesting á sameiginlegum vilja ríkisstjórnarinnar og lækna til að ráðast í stórfellt átak í uppbyggingu heilbrigðisþjónstu á Íslandi. Viðurkenning á því að sparnaður undanfarinna ára hafi haft verulega áhrif á þá þjónustu sem að er veitt hér en jafnframt staðfesting á möguleika Íslands á því að verða aftur land sem að býður heilbrigðisþjónustu í fremstu röð,“ segir Sigmundur Davíð Gunnlaugsson forsætisráðherra.

Í yfirlýsingunni sem var undirrituð er meðal annars komið inn á bygginu nýs Landspítala og vonast forsætisráðherra til að það geti orðið fyrr en menn áttu von á þó engar tímasetningar liggi fyrir. Samkvæmt heimildum fréttastofu felur kjarasamningurinn við Læknafélagið sem var undirritaður í gær í sér að læknar fá strax við undirritun samningsins nokkuð yfir 10 prósent launahækkun. Auk þess sem frekari launahækkanir koma til á samningstímanum sem er þrjú ár.

„ Ég vona auðvitað að þetta hafi ekki neikvæð áhrif á komandi kjarasamninga vegna þess að þar eru til staðar tækifæri til þess að bæta verulega kjör alls almennings í landinu. Fólk held ég almennt skildi mikilvægi þess að verja heilbrigðiskerfið og bregðast við því ástandi sem upp var komið,“ segir Sigmundur Davíð. Aðspurður um hvort launafólk geti almennt búist við jafn ríkulegum launahækkunum og læknar fengu í komandi kjarasamningum segir Sigmundur svo ekki vera. „ Eins og fjármálaráðherra hefur margítrekað þá hefur það svo sem legið fyrir alllengi að það væri ekki mögulegt en jafnframt virðist vera víðtæk samstaða eða sátt um að þetta séu alveg sérstakar aðstæður, staðan í heilbrigðiskerfinu og staða lækna, sem hafi þurft að bregðast við á sérstakan hátt,“

Rúmum hálfum sólahring áður en fundurinn var í stjórnarráðinu í dag var nýr kjarasamningur undirritaður í Karphúsinu á milli skurðlækna og ríkisins. Skurðlæknar höfðu þá verið samningslausir í um ár. „ Það þurfa allir að gefa eftir í svona viðræðum og þegar að svona stendur á en við erum sátt við þessa niðurstöðu, “ segir Helgi Kjartan Sigurðsson formaður Skurðlæknafélagsins. Þá segist hann eiga von á að skurðlæknar komi til með að samþykkja nýja kjarasamninginn þegar atkvæðagreiðsla fer fram um hann.