Skrifstofustjóri í stjórnarframboði

Skrifstofustjóri skrifstofu skattamála í fjármála- og efnahagsráðuneytinu, Maríanna Jónasdóttir, er í framboði til stjórnar Vátryggingafélags Íslands. Aðalfundur er haldinn í dag. Maríanna er fyrrverandi stjórnarformaður Lífeyrissjóðs starfsmanna ríkisins og hefur jafnframt gegnt öðrum trúnaðarstörfum fyrir sjóðinn.

Maríanna nýtur stuðnings lífeyrissjóðsins í framboði sínu, en A-deild Lífeyrissjóðs starfsmanna ríkisins á 6,42 prósent í fyrirtækinu. Líkt og önnur tryggingafyrirtæki lýtur VÍS eftirliti Fjármálaeftirlitsins og því hafa vaknað upp spurningar um hvort til hagsmunaárekstra kæmi ef Maríanna hlyti kjör til stjórnar.

„Við þekkjum Maríönnu afskaplega vel. Hún starfaði lengi í stjórn lífeyrissjóðsins og oftar en ekki sem formaður eða varaformaður. Þegar sú hugmynd kom upp, þá var svona gengið úr skugga um það hvort þetta samrýmdist hennar stöðu innan fjármálaráðuneytisins. Það kom svar að þeir sæju enga meinbugi á því. Og þá stöndum við á bak við framboð hennar,“ segir Árni Stefán Jónsson, formaður stjórnar Lífeyrissjóðs starfsmanna ríkisins.

Í svari fjármálaráðuneytisins við fyrirspurn Fréttablaðsins kemur fram að sú óskráða regla gildi í ráðuneytinu að starfsfólki tveggja skrifstofa er ekki heimilt að taka sæti í stjórnum eftirlitsskyldra aðila. Það eru skrifstofur efnahagsmála og fjármálamarkaðar og lögfræðisvið. Að öðru leyti gildi ekki takmarkanir umfram það sem kveðið er á um í starfsmannalögum um trúnaðarskyldur og aukastörf.

Þá segir að gegni starfsfólk störfum í stjórnum eða á öðrum vettvangi utan ráðuneytisins og þar er fjallað um mál sem einnig eru á starfssviði viðkomandi í ráðuneytinu skal það samkvæmt tilmælum ráðuneytisins víkja þar sæti.

Sex eru í framboði til stjórnar en einungis fimm stjórnarsæti eru í boði. Af þessum sex frambjóðendum eru fjórar konur en tveir karlar. Vegna laga um kynjakvóta eru karlarnir öruggir inn í stjórnina en ekki konurnar.

Eins og fréttavefurinn Vísir greindi frá fyrr í vikunni gefur núverandi stjórnarformaður, Hallbjörn Karlsson, ekki kost á sér til setu í stjórn næsta árið.