Tveir sóttir á Fimmvörðuháls

Björgunarsveitir á Suðurlandi voru kallaðar út nú síðdegis þegar beiðni barst um aðstoð frá tveimur erlendum ferðalöngum er staddir voru á Fimmvörðuhálsi.

Ferðamennirnir höfðu ætlað sér að ganga frá Skógum í Þórsmörk en eftir um þriggja tíma göngu reyndust aðstæður þeim ofviða. Mjög hvasst var á Fimmvörðuhálsi í dag.

„Send voru svokölluð Rescue Me skilaboð í síma þeirra. Þau virka þannig að svari viðkomandi boðunum kemur nákvæm staðsetning hans með svarinu. Björgunarsveitir fundu svo mennina á þeim stað er boðin gáfu til kynna, eða í um 500 m hæð. Voru þeir heilir á húfi en farnir að kólna,“ segir í tilkynningunni.