Búið að slökkva sinueld við Stokkseyri

„Þetta er að klárast, síðustu menn eru bara að fara af staðnum,“ segir Lárus Guðmundsson, aðstoðarvarðstjóri hjá Brunavörnum Árnessýslu.

Tilkynning barst um sinueld við Stokkseyri um klukkan 10 í morgun á sama svæði og kviknaði í í gærkvöldi. Þá urðu yfir 10 hektarar lands eldi að bráð.

Lárus segir að slökkvistarfið sjálft hafi tekið um klukkutíma en útkallið hátt í þrjá tíma þar sem erfitt sé að komast að svæðinu.

„Við náðum að flytja litla dælu inn á svæðið á kajak og teljum að við séum nú búnir að ráða að niðurlögum eldsins.“