Við erum í bráðri lífshættu við hvert fótspor

Gaflaraleikhúsið frumsýnir í dag barnafarsann Bakaraofninn eftir Gunnar Helgason og Felix Bergsson. Í þessu fjörlega verki fyrir alla fjölskylduna opna Gunni og Felix veitingastaðinn Bakaraofninn þar sem matargerð er lyst og lenda í alls kyns vandræðum og ævintýrum.



Leikarar ásamt þeim félögum eru þau Elva Ósk Ólafsdóttir og Ævar Þór Benediktsson, leikstjóri er Björk Jakobsdóttir og tónlistin er eftir Mána Svavarsson, þann hinn sama og hefur samið alla tónlist fyrir Latabæjarþættina.



„Við Felix höfum reyndar ekki leikið saman á sviði síðan í West Side Story árið 1995 þegar ég skaut hann til bana í lok hverrar sýningar,“ segir Gunni og hlær. „En nú erum við aftur sameinaðir á sviðinu og í brjáluðu stuði. Þessi skotárás í West Side Story hefur samt setið eitthvað í Felix mínum því um daginn henti hann í mig málningarfötu svo að vörin sprakk. Það sprungu reyndar allir líka úr hlátri og því var ákveðið að hafa þetta með í sýningunni.

 

Nú fæ ég fjórar málningarfötur í fangið á hverri sýningu og Felix lofaði að passa sig betur,“ segir Gunni og hlær áður en hann bætir við: „Þetta málningarfötu atriði er aðeins eitt af mörgum áhættuatriðum í sýningunni. Við erum í bráðri lífshættu við hvert fótspor. Við erum svolítið undir áhrifum frá Vesturporti og ætluðum að láta fólk fljúga alveg hægri vinstri en lofthæðin er svo lítil í Gaflaraleikhúsinu að við ákváðum bara að búa til kjallara í staðinn og ég fæ að henda Felix niður í hann.

 

„Við sem erum í að skrifa fyrir börn erum í bransanum að bjarga mannslífum. Bækur og leikhús fyrir börn eru svo mikilvægur þáttur í þroska þeirra, námsmöguleikum og framtíð. Við teljum því að það sé mörgum sinnum mikilvægara að gera gott barnaefni en fullorðinsefni og við leggjum okkur alla fram og við lofum góðri fjölskylduskemmtun í Gaflaraleikhúsinu á næstunni.“