Árni Páll stappar stálinu í flokkssystkini sín: „Ef við hættum að vera samfylking verðum við bara sundurfylking“

Árni Páll Árnason, formaður Samfylkingarinnar, stappar stálinu í flokksstjórnarfulltrúa flokksins í tölvupósti sem hann sendi þeim í dag.

Þar lýsir formaðurinn áhyggjum sínum af fylgi flokksins og stöðu hans en Samfylkingin mældist fyrr í mánuðinum með 9,5% í skoðanakönnun MMR. Flokkurinn hefur aldrei mælst með jafnlítið fylgi.

Í pósti sínum segir Árni Páll:

„Á hinn bóginn vil ég nefna áhyggjur af fylgi flokksins og stöðu hans. Við getum ekki sætt okkur við 9,5% fylgi og verðum að bindast samtökum um að snúa þeirri stöðu við. Við lok landsfundarins í lok mars benti ég á að við þyrftum öll að vinna úr þeirri erfiðu stöðu – ég gæti það ekki einn. Það er enn sannfæring mín. Mestu skiptir að við stöndum saman um hugmyndina um samfylkingu.“

Þykir vænt um nafn Samfylkingarinnar

Árni Páll segir síðan að honum þyki, öfugt við ýmsa flokksmenn, vænt um nafn Samfylkingarinnar. Hann segir ástæðuna þá að nafnið segi allt sem segja þarf. Alls konar fólk hafi komið saman og stofnað flokkinn, meðal annars „femínistar, hægrikratar“ og „kommar“. Sannfæring þeirra sem komu að stofnun Samfylkingar hafi þó verið sú að þeir vildu vera „innan samfylkingar með öðrum,“ þrátt fyrir ólíka merkimiða.

„Vegna þess að við vissum að eins heillandi og sérstaðan er um stund, dæmir hún okkur til áhrifaleysis þegar til lengdar lætur. Umbótasinnuð öfl, hverju nafni sem nefnast, þurfa sameiginlegan vettvang. Ef Samfylkingunni bregst ætlunarverkið veitir nafnið líka svar um hvað gerist: Ef við hættum að vera samfylking verðum við bara sundurfylking. Og það hlýtur að vera martröð okkar allra.“

Í lok póstsins brýnir Árni Páll svo flokksstjórnarmenn til að hugsa sitt ráð:

„Ég vil þess vegna brýna okkur öll til að hugsa nú okkar ráð og velta því fyrir okkur hvert og eitt hvað við getum gert til að styrkja Samfylkinguna til að vera þá fjöldahreyfingu sem við höfum öll metnað til að hún verði á ný.“