Starfsemi teygi sig á Reykjanes

„Rík ástæða er til að mótuð verði heildarsýn fyrir hafnarstarfsemi á Faxaflóa til framtíðar,“ segir í tillögu Júlíusar Vífils Ingvarssonar sem stjórn Faxaflóahafna hefur samþykkt.

„Aðalskipulagsáætlanir sveitarfélaga hafa að geyma leiðarljós og bindandi markmið til lengri tíma en skipulagsáætlanir lýsa ekki framtíðarstefnu Faxaflóahafna,“ segir í tillögunni. Æskilegt er sagt að skoða möguleika á sameiginlegri hafnarstarfsemi á svæðinu frá Reykjanesskaga til Borgarfjarðar. Grundvöllur vinnunnar verði sameiginlegir hagsmunir, vöxtur og hagkvæmni hafnarstarfsemi svæðisins.

„Við mótun stefnunnar verði haft náið samráð við sveitarfélög, samtök sveitarfélaga, íbúa og aðra hagsmunaaðila.“