Á ferð með Pixies

Lilja Björk Hauksdóttir skrifar 3. febrúar 2014 13:00

Mono Town hitaði upp fyrir hljómsveitina heimsfrægu, Pixies, á þrennum tónleikum síðastliðið haust.
aðsend mynd — Mono Town hitaði upp fyrir hljómsveitina heimsfrægu, Pixies, á þrennum tónleikum síðastliðið haust. aðsend mynd

Hljómsveitin Mono Town kom fram á tónlistarhátíðinni „Soirées Iceland Airwaves à Paris“ – eða Iceland Airwaves-kvöld í París á Air d'Islande-hátíðinni í Pompidou-listasafninu á laugardagskvöld. Bjarki Sig segir það hafa verið skemmtilega tilviljun að bandið gaf út sína fyrstu plötu fyrir nokkrum dögum þannig að tónleikarnir hafi verið nokkurs konar útgáfutónleikar.

Platan á netinu

Platan In the Eye of the Storm kom út á netinu í samstarfi við streymisþjónustuna Deezer. Streymisþjónustan sem um ræðir hefur um það bil sex milljónir áskrifenda og hátt í tíu milljónir notenda um allan heim. „Við gefum plötuna út núna bara á netinu en búumst við því að gefa hana út bæði á vínyl og geisladiski eftir um það bil tvo mánuði. Við skoðuðum vel þá kosti sem voru í boði og þetta varð niðurstaðan. Á Deezer getur fólk hlustað frítt á tónlistina okkar í ákveðinn tíma. Eftir nokkra daga verðum við svo lausir allra mála hjá streymisþjónustunni og þá verður hægt að fá plötuna okkar víðar á netinu, svo sem á iTunes. Við höfum fengið góðar viðtökur við plötunni þessa daga sem hún hefur verið í spilun og erum mjög sáttir með hana.“

Gera allt sjálfir

Strákarnir tóku sér góðan tíma í að semja tónlistina fyrir plötuna og lögðu mikið í hana. Þeir sáu um mestalla vinnuna í kringum hana og stjórnuðu upptökum meðal annars sjálfir. „Við erum búnir að spila saman síðan árið 2009 og það fór mestur tími í að finna „sándið“ okkar. Við vorum duglegir að henda upptökum og byrja aftur og aftur. Við duttum svo niður á það sem við vorum sáttir við og vissum þá hvert við vildum stefna. Við lögðust svo í að gera plötuna og tókum tvo mánuði alveg stíft í að klára hana.“

Ævintýrið með pixies

Mono Town hitaði upp fyrir stórhljómsveitina Pixies á þrennum tónleikum í nóvember síðastliðnum. Þeir voru haldnir á tónleikastöðum sem tóku allt upp í þrjú þúsund manns í Kaupmannahöfn, Stokkhólmi og Ósló. „Það var fyrst og fremst heiður að fá að spila fyrir Pixies. Það er mikil atvinnumennska í þessu hjá þeim og það stóð allt eins og stafur á bók sem var sagt við okkur. Dæmi um þetta var þegar sviðsmaður Pixies sótti okkur fimm mínútum fyrir tónleika og sagði að við ættum að vera tilbúnir. Við höfðum þrjátíu mínútur á sviðinu og ég segi við hann að við séum nýbúnir að tímamæla okkur og tónleikarnir okkar taki rétt rúmlega hálftíma og að hann megi láta okkur vita ef við erum eitthvað að fara yfir tímann. Hann segir þá að við munum alveg verða varir við það því ef við förum yfir þrjátíu mínúturnar slökkvi hann einfaldlega á okkur. Og hann var alls ekki að grínast. Þegar við komum svo af sviði brosti hann til mín og sagði: „Spot on, lad, 29 minutes and 32 seconds!“,“ segir Bjarki og hlær.

Könnuðust við brennivínið

Það var uppselt á alla tónleika Pixies á ferðalaginu og sveitin á dyggan aðdáendahóp. Bjarki segist hafa hlakkað til að sjá þau á tónleikum þar sem hann hafi heyrt sögur af því að þau hafi ekki verið neitt sérstök þegar þau spiluðu hér á Íslandi fyrir um tíu árum. „Þau komu mér á óvart og voru rosalega góð, þétt og kraftmikil. Þau spiluðu yfir þrjátíu lög á kvöldi þessi þrjú kvöld sem við vorum með þeim. Eftir síðustu tónleikana bönkuðum við upp á hjá þeim og þökkuðum fyrir okkur. Við gáfum þeim harðfisk og brennivín sem þau könnuðust vel við. Þau opnuðu svo brennivínið strax og drukku það."

Fjölskylduband

Bjarki segir Mono Town hafa verið vel tekið á tónleikunum en í hljómsveitinni eru bræðurnir Börkur Hrafn og Daði Birgissynir ásamt frænda sínum Bjarka. „Við frændurnir þrír erum kjarninn og reynum eftir fremsta megni að hafa með okkur bassaleikarann Guðmund Óskar Guðmundsson sem spilar með Hjaltalín og Tilbury og trommuleikarann Magnús Tryggvason Elíassen sem er líka í Tilbury, Amiinu og fleiri böndum.“

Mest lesið

Fleiri fréttir

Mest lesið

Fleiri fréttir

Mest lesið

Tarot dagsins