Enginn umsækjandi um Borgarleikhússtjórastólinn kominn fram

Leikfélag Reykjavíkur auglýsti starf leikhússtjóra Borgarleikhússins laust til umsóknar nú fyrir helgi en Magnús Geir Þórðarson er nú að hverfa til annarra starfa, nefnilega þess að stýra Ríkisútvarpinu. Þorgerður Katrín Gunnarsdóttir er stjórnarformaður LR og hún segir umsóknarfrest renna út 11. febrúar. „Við ætlum að reyna að vinna þetta svo fljótt sem auðið er og og miðum við að línur verða orðnar skýrar fyrir mánaðarmótin febrúar mars. Jafnvel fyrr.“

Öflug menningarstofnun

Þorgerður segir að engin umsókn sé komin enn sem komið er, ekki svo hún viti. Enda dagurinn í dag sá fyrsti virki eftir að auglýst var eftir leikhússtjóra. Þá segir stjórnarformaðurinn að hefð sé fyrir því að umsóknir berist ekki fyrr en með seinni skipunum.

Magnús Geir er í fullu starfi hjá leikhúsinu til 10. mars. „Við höfum komist að samkomulagi um það og eftir það mun hann verða leikhúsinu innan handar. Það verður gaman að sjá hverjir sækja um. Þetta er ótrúlega sterk menningarstofnun, Borgarleikhúsið; öflug og leiðandi á sínu sviði og allar undirstöður eru sterkar – inniviðir allir, starfsfólk og strúktúr.“

Jón Gnarr efstur á blaði

Engar hæfniskröfur eru gerðar til umsækjenda. „Við biðjum um menntun og reynslu en það er þó ekki skilyrði. Eins og gengur er öll reynsla og menntun til bóta frekar en hitt. Þá skiptir máli að menn geti lýst framtíðarsýn sinni með minna en 800 orðum, skiptir máli að menn kunni að koma orðum að hlutunum,“ segir Þorgerður Katrín.

DV veltir vöngum yfir hugsanlegum kandídötum og þar eru nefndir: Jón Gnarr, Kristín Jóhannesdóttir, Marta Nordal, Bergur Ingólfsson, Hilmar Jónsson, Katrín Hall, Þorleifur Arnarson, Gísli Örn Garðarsson & Rakel Garðarsdóttir, Kolbrún Halldórsdóttir, Kjartan Ragnarsson, Ólafur Egilsson, Unnur Ösp Stefánsdóttir, Una Þorleifsdóttir, Ragnheiður Skúladóttir og Ari Matthíasson.