Vistaður á réttargeðdeildinni

Maðurinn sem grunaður er um að hafa orðið konu sinni að bana á heimili þeirra í Stelkshólum í lok síðasta mánaðar hefur verið vistaður á réttargeðdeildinni á Kleppi.

Samkvæmt heimildum Fréttablaðsins hefur það verið gert til hagræðingar að frumkvæði geðlæknis sem sér um að framkvæma geðmat á manninum. Mun hann dvelja á réttargeðdeildinni að minnsta kosti þar til að geðmati loknu. Hann hafði áður setið í gæsluvarðhaldi á Litla-Hrauni.

Rannsókn tæknideildar lögreglu er langt á veg komin en íbúð hjónanna er enn þá innsigluð.

Börn mannsins dvelja enn hér á landi hjá vinafólki fjölskyldunnar en barnavernd vinnur að því að kanna aðstæður hjá ættingjum þeirra í Póllandi.