Það mun bæði heyrast til okkar og sjást

„Afmælisveislan stendur frá klukkan hálf tólf til hálf tvö.

Við byrjum á skrúðgöngu um hverfið sem Skólahljómsveit Kópavogs leiðir með tilheyrandi lúðrablæstri,“ segir Björg Baldursdóttir, starfandi skólastjóri hins tvítuga Smáraskóla í Kópavogi.

„Nemendur og kennarar verða með kórónur í mismunandi litum eftir stigum. Það mun því bæði heyrast til okkar og sjást.“



Björg segir tónlist verða leikna á sal og verk núverandi og fyrrverandi nemenda verða til sýnis inni í skólanum.

Úti við verður svo farið í alls konar leiki. Þar verður hoppukastali, boltar sem krakkar geta skriðið inn í og „fótboltaspil“ með lifandi fólki sem stillir sér upp við strengi og spilar eins og um leikfang sé að ræða.

Svo, eins og í öllum góðum afmælum, verður boðið upp á köku, kaffi og djús að sögn Bjargar. „Við fáum stóra köku frá Jóa Fel, hann er einn þeirra foreldra sem tengjast skólanum,“ segir hún og kveðst vonast til að sjá sem flesta velunnara.

Nemendum við skólann hefur fækkað frá því í upphafi, að sögn Bjargar. „Hér voru lausar kennslustofur umhverfis skólahúsið fyrstu árin, enda er barnafjöldinn yfirleitt mestur í nýjum hverfum, svo fækkar í þeim aldurshópi en fjölgar aftur og nær einhverju jafnvægi.“

Eitt af því sem einkennir starf Smáraskóla er áhersla á útivist enda er skólinn vel staðsettur í Kópavogsdalnum. „Við notum dalinn til útivistar og lærdóms,“ segir Björg.

„Skoðum náttúruna og lífríkið, tökum til dæmis sýni úr læknum reglulega og gerum á því rannsóknir. Svo er stutt niður í leiruna við voginn og auðvelt að komast þangað um göngin undir Hafnarfjarðarveginum,“ lýsir hún.

Stærsta útivistarverkefni skólans sem komin er hefð á er Laugavegsganga 8. bekkjar, milli Landmannalauga og Þórsmerkur, með gistingu í skálum á leiðinni.

„Það er afskaplega mikil ánægja með Laugavegsgönguna,“ segir Björg.

„Sumir nemendur hafa sagt þegar þeir yfirgefa skólann að sú gönguferð standi upp úr þegar þeir hugsi til baka. Þetta eru stórir hópar sem við förum með, 40 til 60 manns, og við þurfum að panta gistingu í skálunum með löngum fyrirvara, alltaf lengri og lengri eftir því sem ferðamönnum fjölgar.“

Kennslustofur og aðrar vistarverur Smáraskóla eru ekki númeraðar heldur nefndar eftir örnefnum í Kópavogi. Eitt af því gert hefur verið í tilefni afmælisins nú er að afla upplýsinga um þá staði sem stofurnar heita eftir, að sögn Bjargar.

„Kópavogur á stórt land sem auðugt er af örnefnum og sköpunargáfa nemendanna hefur nýst vel við að teikna myndir sem tengjast þeim.“

Smáraskóli er við Dalsmára 1 í Kópavogi og er fyrir börn á aldrinum sex til fimmtán ára. Valgerður Snæland Jónsdóttir var skólastjóri frá stofnun hans til ársins 2007. Núverandi skólastjóri, Friðþjófur Helgi Karlsson, er í ársleyfi og Björg Baldursdóttir sinnir starfinu í fjarveru hans en hún hefur verið aðstoðarskólastjóri frá 2010.