Hárakademían opnar í Mörkinni í ágúst

Harpa Ómarsdóttir hárgreiðslumeistari opnar nýjan og spennandi hárgreiðsluskóla í samstarfi við Label M á Íslandi.

Nú er tækifærið að fara í nám sem tekur styttri tíma, en hárgreiðslunámið hefur verið fjögur ár hingað til. Vandamálið í dag eru námssamningar hjá nemum og þetta er nýjasta lausnin við því,“ segir Harpa Ómarsdóttir, eigandi Hárakademíunnar sem verður opnuð í Mörkinni 1 í ágúst í samstarfi við Label M á Íslandi.

„Það hefur vantað svona gæðaskóla en stefnan er að koma nemendum á samning og útskrifa framúrskarandi fagfólk,“ segir hún. Harpa hefur sjálf mikla reynslu innan bransans. Hún hefur unnið við fagið í 15 ár og öðlast þekkingu frá erlendum akademíum á borð við Aveda, Tony and Guy og Vidal Sassoon. Einnig hefur hún kennt íslensku fagfólki í gegnum árin.

Hárakademían mun bjóða upp á tólf mánaða nám til sveinsprófs í akademíunni og námssamning sem er styttri en aðrir skólar hafa boðið upp á. „Það mun fjöldinn allur af gestaleiðbeinendum koma að náminu en það er allt spennandi fólk sem hefur ýmislegt gott til brunns að bera.“

Í kringum fjórtán manns fá inntöku í skólann og er 18 ára aldurstakmark. Nánari upplýsingar er að finna á heimasíðu skólans, harakademian.is.