Rokkið tekur yfir leikhúsið

„Þetta er nýtt í íslensku leikhúsi, þungarokkið fer inn í leikhúsið og leikhúsið inn í þungarokkið. Við byrjum að æfa tveimur vikum fyrir frumsýningu og vitum nákvæmlega hvað við ætlum að gera,“ segir Halldór Gylfason, leikstjóri verksins Baldurs, sem frumsýnt verður í Borgarleikhúsinu 4. apríl. Baldur er nafn fyrstu breiðskífu Skálmaldar og er eitt heildstætt verk laga og texta.

„Sagan Baldur varð til áður en Skálmöld varð til og var hugmynd sem ég var búinn að ganga með lengi. Það er gaman að sjá að gömul hugmynd hafi orðið að plötu og sé nú að fara í leikhúsið,“ útskýrir Snæbjörn Ragnarsson, betur þekktur sem Bibbi, bassaleikari Skálmaldar.

Platan Baldur verður leikin í gegn og þrír leikarar, þau Guðjón Davíð Karlsson, Hilmar Guðjónsson og Hildur Berglind Arndal, hjálpa til við að fleyta sögunni áfram.

„Þetta eru tónleikar með Skálmöld og leikarar hjálpa til við að koma sögunni fram. Við notum líka sprengjur og annað slíkt sem leikhúsið hefur upp á að bjóða,“ segir Halldór um sýninguna. Halldór segist vera mjög spenntur, enda sé hann mikill þungarokksaðdáandi.

Eins og fram hefur komið gekk Bibbi með söguna Baldur lengi í maganum áður en kýlt var á framkvæmdina. „Ég sendi tölvupóst á Skálmaldarmenn, sem voru reyndar ekki orðnir Skálmaldarmenn þá því sveitin var ekki til þá, og sagði að þeir væru komnir í hljómsveitina. Í sama tölvupósti útskýrði ég söguna Baldur í heild sinni og þar með hófst ævintýrið,“ útskýrir Bibbi. Hann bætir við að allir meðlimir Skálmaldar séu ævintýragjarnir. „Við höfum allir gaman af þessum íslensku rótum, sagnaarfinum og goðasögunum. Við „roleplay-um“ þegar við getum,“ bætir Bibbi við.