Brettaskóli vekur mikla lukku

„Það eru krakkar allt niður í þriggja ára sem koma til okkar,“ segir Davíð Arnar Oddgeirsson sem stofnaði brettaskóla Mintsnow og Bláfjalla í samstarfi við skíðasvæðin og hefur hann fengið góðar undirtektir hjá yngri kynslóðinni. Þó sækir fólk á öllum aldri skólann.

„Þetta fór vel af stað í fyrra og mættu um 200 krakkar alls í skólann þann veturinn. Nú er þetta annað árið sem skólinn er starfrækur og fer hann bara vel af stað,“ útskýrir Davíð Arnar. Metaðsókn var í skólann í síðustu viku þegar 27 manns mættu.

Brettaskólinn er fyrir alla þá sem vilja ná tökum á rennslinu á brettunum og þetta hentar vel fyrir foreldra sem eiga oft í erfiðleikum með að kenna börnunum sjálf þar sem þau eru á skíðum.

Davíð kennir þó ekki einn því hann er með snjóbrettafólk með mikla þekkingu sem kennir með honum. „Okkur finnst þetta öllum ofboðslega gaman og gefandi. Að sjá nemendur taka framförum og að þau brosi í lok dags er góð tilfinning. Maður kann alveg helling eftir einn dag í brettaskólanum." Þá mætir fólk gjarnan oftar en einu sinni í skólann til að ná enn betri tökum á brettinu.

Brettaskólinn er alla laugardaga og sunnudaga, svo lengi sem það sé opið í Bláfjöllum. Kennslan er í fjóra tíma frá klukkan 10.30 til 14.30 og innifalið er dagspassi í fjallið og hádegismatur fyrir krakkana. Skráning í skólann fer fram á www.skidasvaedi.is.