Lífið

Fataskápur frú Vigdísar forseta

Sólveig Gísladóttir skrifar

Sýningin "Ertu tilbúin frú forseti?“ hefst í Hönnunarsafni Íslands á föstudag. Sýndur er fatnaður og fylgihlutir úr eigu Vigdísar Finnbogadóttur.

Vigdís er fyrirmynd margra enda ruddi hún braut kvenna til nýrra metorða í vestrænum samfélögum. Okkar langaði hins vegar að reyna að varpa ljósi á það sem minna er talað er um en var stór hluti af hennar mikilvæga hlutverki. Það er að fatnaður er ekki aukaatriði í lífi kvenna, hvort sem þær eru þjóðarleiðtogar eða venjulegar konur, heldur skipti höfuðmáli í framkomu,“ segir Harpa Þórsdóttir, forstöðumaður Hönnunarsafns Íslands. Hún hefur í tvö ár unnið að undirbúningi sýningarinnar „Ertu tilbúin frú forseti?“ þar sem sýndur er fatnaður og ýmsir fylgihlutir Vigdísar Finnbogadóttur, fyrrverandi forseta Íslands.

„Ég hef lengi haft áhuga á því að sýna meira af fatnaði í safninu hér heima en slíkar sýningar eru tiltölulega algengar í hönnunarsöfnum erlendis,“ upplýsir Harpa sem er í sýningarnefnd ásamt Ástríði Magnúsdóttur, dóttur Vigdísar, og Guðrúnu Hildi Rosenkjær, klæðskera- og kjólameistara. „Ástríður þekkir vitanlega vel til móður sinnar og strax í upphafi vinnunnar var auðvelt að sjá hvernig sýningin gæti orðið, þar sem við drögum fram söguna, orðið og fatnaðinn. Guðrún vann sem ung kona hjá Vigdísi við embætti forsetans og þekkir því vel til,“ segir Harpa.

Sýningin var einnig unnin í góðu samstarfi við Vigdísi sjálfa. „Vigdís tók hugmyndinni strax vel sem er dæmigert fyrir viðhorf hennar til lífsins,“ segir Harpa glaðlega. Öll fötin og fylgihlutirnir sem sjá má á sýningunni eru í einkaeigu Vigdísar sjálfrar. „Hún hefur haldið vel upp á flíkurnar,“ segir Harpa en á sýningunni er lögð áhersla á þær flíkur sem Vigdís klæddist við opinberar heimsóknir og sérstaklega þær sem mörkuðu upphaf ferils hennar.

Sýningin verður opnuð almenningi á safnanótt, föstudaginn 7. febrúar. Opið verður frá 19 til miðnættis en boðið upp á tvær leiðsagnir, klukkan 20 og 22. Sama dag verður gefin út bók í tilefni sýningarinnar. Sýningin stendur til 5. október.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.