Rennsli Tungnaár í sögulegu lágmarki

Rennsli í Tungnaá er komið niður fyrir sögulegt lágmark og rennsli í efri hluta Þjórsár og Blöndu er nærri þeim mörkum einnig. Vatnsforði Landsvirkjunar í miðlunarlónum stefnir í að verða jafn slæmur og í fyrra, en þá hafði aðeins eitt vatnsár mælst óhagstæðara í sögu fyrirtækisins.

Hörður Arnarson, forstjóri Landsvirkjunar, segir að fyrirtækið endurmeti nú þörf á orkuskerðingu vegna þessara óvenjulegu aðstæðna. Þær heimildir sem fyrirtækið hefur til skerðinga eru fullnýttar í augnablikinu, eins og komið hefur fram í fréttum en áætlanir hafa gert ráð fyrir að skerðingar verði tvö prósent af orkuvinnslu fyrirtækisins.

„Það er allavega ekki komið að því,“ segir Hörður spurður hvort þessar óvenjulegu veðuraðstæður með minnkandi rennsli í miðlunarlónin þýði að frekari orkuskerðing sé nauðsynleg. Hann bætir við að vissulega sé stutt liðið af árinu, og ekkert útiloki að um gott vatnsár verði að ræða þegar verður gert upp.

„Á Tungnaársvæðinu er staðan fordæmalaus vegna þurrka. Þetta kemur í kjölfar þess að síðasta ár var mjög slakt, og þegar við fáum annað eins í kjölfarið þá tekur það vel í,“ segir Hörður. Hann segir að Landsvirkjun geti ekki brugðist við þessu ástandi umfram það sem þegar er gert í samningum við viðskiptavini. Þeir eru sveigjanlegir og eru flestir viðskiptavinir Landsvirkjunar með slíka samninga. Stórnotendur, álverin til dæmis, eru með um 10% af sínum samningum sveigjanlega. 

Hörður bendir á að ef samningarnir hefðu ekki þessa innbyggðu vörn gegn óvenjulegum aðstæðum þyrfti að tryggja afhendingu í öllum árum, einnig þeim vatnsminnstu, og slíkt kerfi yrði mun dýrara fyrir orkukaupendur sem fá lægra orkuverð í staðinn fyrir óhagræðið af því að hafa ákveðinn hluta orkunnar skerðanlegan.

Undanfarin 10 ár hefur vatnsbúskapur Landsvirkjunar verið góður; óvenju hátt hlutfall ára hefur verið með innrennsli ofan meðallags og einungis árið í fyrra sem breytir þeirri mynd. Þá náði hvorki Blöndulón né Þórisvatn að fyllast. Innrennsli það sem af er vetri er því afbrigðilegt, og engar mælingar á rennsli Tungnaár í 55 ár sýna lægri gildi – og Blanda rennur í nær sama farvegi hvað þetta varðar.