Karl Steinar til Europol

Karl Steinar Valsson aðstoðaryfirlögregluþjónn mun taka við starfi tengifulltrúa Íslands hjá Europol. Arnar Jensson aðstoðaryfirlögregluþjónn hefur gegnt starfi tengifulltrúa undanfarin ár en Karl Steinar tekur við þann 1. júlí.

Á vef lögreglunnar segir að samstarf Íslands og Europol á sviði löggæslu og öryggismála hafi verið á mörgum sviðum og hafi það haft mikla þýðingu í tengslum við lögreglurannsóknir sem teygt hafa anga sína til annarra landa. Þá hafi sérfræðingar á vegum Europol komið hingað til lands og aðstoðað í tengslum við rannsóknir sakamála.