Liverpool hættir ekki að skora | Markametið bætt hjá félaginu

Markaveislan heldur áfram hjá Liverpool í ensku úrvalsdeildinni en liðið skoraði sex mörk þessa helgina þegar það lagði Cardiff á útivelli, 6-3.

Luis Suárez skoraði aðra þrennu sína á tímabilinu og er kominn með 28 deildarmörk í 25 leikjum. Metið er 31 mark en það hafa bæði Alan Shearer og CristianoRonaldo afrekað. Suárez vantar ekki nema þrjú mörk til að jafna það og fjögur til að bæta metið og hann hefur enn átta leiki til þess að gera það.

Liverpool er á ótrúlegum skriði en liðið hefur ekki tapað á árinu. Það er búið að vinna sex leiki í röð og níu af síðustu ellefu. Það er svo sannarlega í baráttunni um enska meistaratitilinn.

Þessi sex leikja sigurganga er hreint mögnuð hjá Liverpool en það er búið að skora þrjú mörk eða fleiri í öllum leikjunum sex sem er ágætt því það er búið að fá á sig níu mörk. Þá eru fjórir af þessum sex leikjum á útivelli.

Liverpool var betra í fyrri hálfleik til að byrja með á leiktíðinni en hefur nú jafnað út markaskorunina. Markatalan í þessum sex leikjum er 13-5 í fyrri hálfleik og 11-4 í seinni hálfleik.

Liverpool er búið að skora 82 mörk í úrvalsdeildinni, meira en nokkru sinni áður og enn eru átta leikir eftir. Haldi liðið áfram að skora þrjú mörk í leik fer það yfir 100 marka múrinn.