Lúxusvandamál að ráða ekki við álagið

„Við erum bara í standandi vandræðum með þetta. Tölvukallarnir okkar segja að þetta sé fjölsóttasta vefsíða landsins um þessar mundir og við vorum einfaldlega ekki undir þetta álag búin,“ sagði Jón Steindór Valdimarsson, formaður Já, Ísland í samtali við Vísi.

Eins og Vísir hefur greint frá í dag standa nú yfir tvær undirskriftasafnanir gegn því að draga til baka umsókn Íslands að Evrópusambandinu. Önnur þeirra, „Já, ég vil klára“ sem er á vegum samtakana Já, Ísland virðist ekki ráða við þá miklu umferð sem fer um síðuna.

Jón Steindór segir að tæknimenn séu að vinna í að leysa úr tækniflækjunum og liður í því hafi meðal annars verið að taka sjálfvirka teljarann, sem kveður á um hvað margir hafa skráð sig til þessa, úr sambandi. Enn sé þó hægt að skrá sig.

Aðspurður um hvernig þeir hjá samtökunum hafi hugsað sér að takast á við þetta „lúxusvandamál“ segir Jón Steindór að fátt sé ákveðið í þeim efnum.

„Við höfum velt fyrir okkur möguleikanum að birta fjöldann á hálftíma fresti en það hefur ekki verið ákveðið að svo stöddu. Fyrsta mál á dagskrá er þó að flykkjast á Austurvöll núna á eftir klukkan 15,“ en þar vísar Jón Steindór til mótmælanna sem hefjast gegn fyrrgreindri afturköllun.

„Nú þurfum við bara að nýta þann tíma sem við höfum til stefnu til að koma vitinu fyrir ráðamenn,“ segir Jón Steindór vígreifur.