Carlo Ancelotti, knatspyrnustjóri Real Madrid, var ósáttur með sína menn eftir 4-2 tap gegn Real Sociedad í spænsku úrvalsdeildinni í fótbolta í gærkvöldi.
Evrópumeistararnir komust í 2-0 með mörkum frá Sergio Ramos og Gareth Bale, en Baskarnir svöruðu með tveimur mörkum frá David Zurutuza og einu frá Inigo Martinez og Carlos Vela.
Ancelotti sagðist að einbeitingu sinna manna hafi verið ábótavant í leiknum:
„Við þurfum að breyta viðhorfi okkar og einbeitingu í svona leikjum. Þegar þú ert kominn í 2-0 þarftu að sýna einbeitingu til að klára leikinn. Eitthvað þarf að breytast og það mun breytast,“ sagði Ancelotti eftir leikinn og bætti við.
„Það er ekki auðvelt að leggja mat á leikinn, því þetta voru í raun tveir leikir. Við spiluðum mjög vel fyrsta hálftímann. En síðasti klukkutíminn var mjög slæmur af okkar hálfu.
„Við héldum að leikurinn væri búinn. Þetta tap svíður sárt, því mér líkar ekki við liðið sem spilaði síðasta klukkutímann.
„Stærsta vandamálið var að við vörðumst ekki nógu vel til að halda forskotinu. Leikurinn breyttist, við vörðumst illa og jafnvægið í liðinu fór.“
Angel Di Maria og Xabi Alonso yfirgáfu Real Madrid í síðustu viku. Ancelotti segir það ekki hafa skipt sköpum hvað úrslit leiksins gegn Sociedad varðar.
„Það var ekki vandamál að missa einn leikmann, vandamálið var að við köstuðum frá okkur tveggja marka forystu,“ sagði Ancelotti sem neitaði að skella skuldinni á nýju leikmennina, James Rodriguez og Toni Kroos.
„James og Kroos þurfa tíma. Þeir hafa aðlagast vel. Leikur sem þessi er erfiðari fyrir nýja leikmenn en hina.“
Real Madrid mætir Spánarmeisturum Atletico Madrid 13. september í næsta leik sínum í deildinni.
KA
Valur
