„Ég vil að við losum okkur við þá sadista sem eru í kennarastéttinni“

„Ég blandaði mér inn í þessi mál þegar þau voru komin alveg á suðupunkt,“ Stefán Karl Stefánsson fyrrverandi formaður Regnbogabarna, sem ræddi um einelti og þá umræðu sem hefur verið um einelti af völdum kennara í þættinum Bítið á Bylgjunni í morgun.

Grunnskólakennarinn í Grindavík sem hefur að undanförnu verið sakaður um að leggja tiltekna nemendur sína í einelti er farinn í veikindafrí en Vísir hefur fjallað ítarlega um málið að undanförnu.

„Ég setti mig í samband við foreldra þessara þriggja barna sem um ræðir og hef kynnt mér þeirra mál mjög vel með því að lesa skýrslur. Ég blanda mér ekki í svona mál án þess að þekkja báðar hliðar,“ segir Stefán og bendir einnig á að kennarar hafi alltaf andmælarétt þegar svona mál koma upp.

„Umræddur kennari hafði fengið þennan andmælarétt og lágu fyrir viðtöl við báða einstaklinga og því miður er engum blöðum um það að fletta að þarna er um einelti að ræða, það er ekki spurning. Ég lít ekki á mig sem einhvern sérfræðing í svona málum og er það ekki, ég er einfaldlega að stíga fram og passa það að réttur barna sé virtur,“ segir Stefán og bendir á að það hafi rignt yfir hann bréfum frá kennurum sem eru mjög ósáttir við það að það sé verið að saka kennara um einelti.

Eineltið hefur verið staðfest

„Við skulum átta okkur á því að hér er ekkert verið að saka neinn um einelti, það er verið að tala um það að búið sé að staðfesta að um einelti sé að ræða af sérfræðingum. Á þeim forsendum verður fólk brjálað að skólastjórinn skuli ekki víkja kennaranum tímabundið frá störfum á meðan málið sé rannsakað enn frekar.“

Stefán bendir því næst á að lögreglumanni hafi á dögunum verið vikið tímabundið frá starfi á meðan rannsókn á hans máli hafi staðið yfir. Hann segir að eineltisáætlanir skólanna séu mjög skýrar.

„Hér á landi eru barnaverndarlög og við höfum einnig barnasáttmála Sameinuðu þjóðanna. Við eigum að hlusta á börnin. Í lögum segir mjög skýrt að barn skuli alltaf njóta vafans. Viðkomandi kennari, hvort sem hann er sekur eða saklaus í málinu, verður að víkja tímabundið. Málin eru síðan alltaf rannsökuð ítarlega.“

Stefán segir að eineltisáætlanir í skólunum séu til þess að hægt sé að ræða við alla aðila málsins og komast að einhverri niðurstöðu. Hann segir að réttindi kennara í svona málum séu þau að þeir þurfi ávallt að víkja.

„Kennarinn er þá á hálfum launum. Ef það reynist síðan rangt að um einelti sé að ræða þá kemur kennarinn aftur til starfa og fær hinn helming launa sinna aftur til baka.“

Fær oft gömul mál í hendurnar

Stefán segir að hann fái oft mál í hendurnar sem séu orðin tveggja til fjögurra ára gömul.

„Þá er fólk búið að berjast og berjast í kerfinu og lemja á allar dyr, það þarf að samræma áætlanir mun meira. Við erum bara búin að kerfisvæða skólakerfið svo mikið að það skilur eiginlega enginn upp né niður í einu eða neinu.

Stefán segist ekki hafa rætt við umræddan kennara í Grindavík, skólastjórann í skólanum né bæjarstjóranum í Grindavík.

„Þetta fólk hefur ekki viljað tjáð sig og það er kannski erfitt fyrir fólk að tjá sig um einstaka mál. Ég vil bara hvetja kennarastéttina og almennt þá sem starfa í skólum á Íslandi að stíga aðeins fram og ræða málin. Við þurfum ekkert að ræða einstaka mál, við þurfum bara að ræða almennt hvað við eigum að gera til þess að laga þessi mál.“

Stefán segir samt sem áður að heilmikið hafi áunnist í málefnum eineltis í skólunum.

„Flest börn eru í góðum málum en við verðum samt að laga þessi mál og ég hvet fólk til að stíga fram og ræða þetta.“

Hann segir að kennarastéttin sé best varða stéttin samkvæmt lögum.

„Ég þekki enga stétt sem er jafn vel varin. Ef maður les í gegnum lögin þá er gríðarlega erfitt að víkja kennara frá störfum. Það þarf raunverulega að enda með dómi í héraðsdómi. Menn hafa endalausan rétt til þess að andmæla og þar er auðvitað frábært fyrir kennara.“

Erfitt að víkja kennurum

Aðspurður hvort Stefán hafi heyrt um dæmi þar sem skólastjóri hefði verið í vandræðum með að víkja kennara úr starfi svaraði hann því játandi.

„Ég hef heyrt af slíkum dæmum og mjög mikið um það. Það sýnir sig í því að það er verið að færa kennara á milli innan skólans eða færa þá yfir í aðra skóla. Ef þú ert óhæfur til þess að kenna börnum þá áttu ekki að vera kenna börnum.“

Stefán segir að það eigi að víkja kennara úr starfi ef það er einhver vafi hvort hann sé hæfur til að kenna börnum.

„Það á að taka af þér kennararéttindin og víkja þér, það er enginn spurning. Ég er hér til þess að vernda börnin og þau eiga alltaf að njóta vafans. Ég skal bara segja það beint út, ég vil að við losum okkur við þá sadista sem eru í kennarastéttinni.“

Hægt er að hlusta á viðtalið í heild sinni hér að ofan.