"Endurvinna gamla gagnrýni"

Forsætisráðherra segir stjórnarandstöðuna fasta í að vera neikvæð í garð skuldaleiðréttingarinnar. Nú þegar hún sé komin til framkvæmda reynist það hinsvegar erfitt og því sé gripið til þess ráðs að endurvinna gamla gagnrýni, þótt hún eigi ekki lengur við.

Rætt var um skuldaleiðréttinguna á Alþingi í dag. Margvísleg gagnrýni kom frá stjórnarandstöðunni á þingfundinum, meðal annars að aðgerðin væri sértæk og nýttist einungis hluta þjóðarinnar, fjármununum væri betur varið í annað og að meiru hefði verið lofað.



Forsætisráðherra segir að umræðan á þinginu komi sér ekki á óvart.

„Hún hefur verið eins og við mátti búast. Hér hafa verið ánægðir stjórnarliðar og þeir hafa alveg fullt tilefni til þess enda er niðurstaðan svo góð á svo margan hátt. En því miður var stjórnarandstaðan búin að koma sér í þá stöðu að hún virðist telja að hún verði að vera neikvæð. En núna þegar niðurstöðurnar liggja fyrir þá gengur þeim illa að finna nýja gagnrýni á þetta og ákveða þá bara að endurvinna þá gömlu þó hún eigi ekki lengur við,“ segir Sigmundur Davíð Gunnlaugsson, forsætisráðherra.

Fjármögnun leiðréttingarinnar hefur einnig verið gagnrýnd þar sem ekki er að fullu ljóst hvort bankaskatturinn svokallaði standist lög.

„Auðvitað er ekkert í lífinu öruggt nema, svo ég vitni aftur í Benjamin Franklin, dauðinn og skattar.“

Sigmundur segir að öll þau markmið sem lagt var upp með varðandi skuldaleiðréttinguna hafa náðst.



„Þau hafa öll náðst, öll markmiðin sem við settum okkur fyrir síðustu kosningar og eftir þær líka. Þetta er öðruvísi aðferð heldur en við lögðum til í byrjun árs 2009. Ef þetta hefði verið gert á þeim tíma hefði það vissulega verið einfaldara og jafnvel hagkvæmara og haft áhrif fyrr á efnahagslífið og fyrir heimilin. En úr því sem komið var, var þetta besta leiðin,“ segir Sigmundur.