Borgarfulltrúi Framsóknar: Segir blaðamenn DV með greindarvísitölu undir stofuhita

Guðfinna Guðmundsdóttir, annar borgarfulltrúa Framsóknar, lét gamminn geysa á kommentakerfi DV í nótt. „Það er allavega eitt öruggt í þessu lífi og það er það að DV er drasl,“ sagði Guðfinna og bætti svo við: „Svo þarf ég að fara fá prósentur frá DV, það er beinlínis ósanngjarnt að það skuli bara vera blaðamenn með greindarvísitölu undir stofuita [stofuhita] sem fái laun frá þessum merka fjölmiðli.“

Ummælin lét hún falla við frétt þar sem eiginmaður hennar, Svanur Guðmundsson, segist í samtali við blaðamann DV gera ráð fyrir því að eiginkona hans beiti sér fyrir hagsmunum fyrirtækis hans, Smáíbúða ehf., við lóðaúthlutun í borginni fyrir gámaíbúðir. Guðfinna segist í sömu frétt hins vegar ekki ætla að beita sér í málinu og að ummæli eiginmanns hennar hafi verið sett fram í öðru samhengi.

Guðfinna segir jafnframt í kommentakerfinu að málið, það er varðandi lóðaúthlutun fyrir gámaíbúðir, hafi „dáið“ á síðasta kjörtímabili. Hún hafi reynt „að segja dv barninu frá því“ en að hann hafi verið „of vitlaus til að skilja þetta.“

Hallgrímur Thorsteinsson, ritstjóri DV, segir ekkert að fréttinni og hann sjálfur hafi ekki rætt við Guðfinnu um þessa gagnrýni hennar, hún hafi eingöngu birst þarna í kommentakerfinu. Hann hefur að öðru leyti ekki mikið um framgöngu Guðfinnu að segja. „Ég held þetta lýsi best manneskjunni sjálfri.“

En finnst þér í lagi að kjörinn fulltrúi í borginni tjái sig með þessum hætti um blaðamann ykkar?



„Það er greinilega fullt af fólki á kommentakerfunum sem er ekki í lagi.“

Einn þeirra sem tjáð sig hefur um málið er Jón Trausti Reynisson, fyrrverandi ritstjóri og framkvæmdastjóri DV. Hann segir á Facebook-síðu sinni meðlimi Framsóknar færa umræðuna á annað plan. „Sama hvað manni finnst um umkvörtunarefni Guðfinnu Jóhönnu Guðmundsdóttur, borgarfulltrúa Framsóknarflokksins í Reykjavík, er ansi langt gengið að segja fólk vera með „greindarvísitölu undir stofuhita“ og kalla blaðamann „fífl“ og „vitlaust barn“. Það er vond tilfinning að lýðræðislega kjörnir fulltrúar skuli fara með umræðuhefðina niður í ræsið.“

.

.

.