Lögregla bar út tölvur og fleira af heimili Hilmars Leifssonar

Lögregla og sérsveitin tóku þátt í aðgerðum á heimili Hilmars Leifssonar í dag þar sem bornar voru út tölvur og aðrar eigur. DV greindi frá þessu fyrr í kvöld.

Að sögn mætti lið lögreglu á tæplega tíu bílum, en lögregla hefur ekki viljað tjá sig um aðgerðirnar eða á tilgang þeirra.

Fyrr í vikunni greindi Vísir frá því að lögregla rannsakaði nú líkamsárás sem framin var fyrir utan Sporthúsið á miðvikudaginn í síðustu viku. Var þá ráðist á Benjamín Þór Þorgrímsson, sem einnig er þekktur sem Benni Ólsari, en hann starfa sem einkaþjálfari í Sporthúsinu.

Vísir fjallaði um málið, en vinur Benjamíns, Gilbert Sigurðsson, vakti athygli á málinu með skrifum á Facebook. Gilbert segir árásina tengjast langvinnum deilum sínum við Hilmar Leifsson. Gilbert segir frá því á Facebook að fimm hettuklæddir menn hafi ráðist á Benjamín með þeim afleiðingum að hann nefbrotnaði auk þess sem hann hlaut innvortisblæðingar, eins og hann tjáði Vísi daginn eftir árásina.