Ráðherra heimilt að krefjast rafrænna skilríkja

Bjarna Benediktssyni, fjármálaráðherra, mátti samkvæmt lögum krefjast þess að rafræna undirskrift þurfi til að samþykkja leiðréttingu verðtryggðra fasteignaveðlána. Þetta kemur fram í niðurstöðu Umboðsmanns Alþingis, sem hefur lokið athugun sinni á nokkrum kvörtunum sem honum bárust.

Í lögum um leiðréttingu verðtryggðra fasteignaveðlána og lögskýringargögnum að baki þeim, er Ríkisskattstjóra fengin heimild til að ákveða form umsókna og ráðherra til að setja nánari ákvæði í reglugerð um framkvæmd laga.

„Með vísan til þess hvaða umgjörð löggjafinn hefur búið til fyrir meðferð þessara mála telur umboðsmaður sig ekki hafa forsendur til að fullyrða að ráðherra hafi verið óheimilt að útfæra hina rafrænu málsmeðferð nánar í reglugerð og setja ákvæði um rafræna undirritun með rafrænum skilríkjum,“ segir í niðurstöðu Umboðsmanns.

Umboðsmaður benti þó þeim sem til hans leituðu að samkvæmt reglugerðinni er heimilt að víkja frá kröfum um samþykki með rafrænni undirritun í tilteknum tilvikum.

„Ef viðkomandi telur að ekki sé tekið nægjanlegt tillit til þeirra tilvika sem geta risið í framkvæmd er hægt að beina ábendingu þess efnis til fjármála- og efnahagsráðuneytisins eða ríkisskattstjóra.“