„Gott að enginn getur séð myndbandið - engin sönnun“

Fimmmenningarnir sem sakaðir eru um að hafa nauðgað sextán ára stúlku aðfararnótt sunnudagsins 4. maí ræddu atvikið sín á milli á Facebook samkvæmt heimildum Vísis. Þar hafi meðal annars komið fram frá einum þeirra að gott sé að enginn geti séð myndbandið - þá liggi engin sönnun fyrir.

Einn sakborninganna mun einnig hafa verið í samskiptum við stúlkuna eftir atvikið og beðist afsökunar.

Lögreglan heldur því fram að myndbandið sem liggur fyrir í málinu og var tekið af einum piltanna staðfesti frásögn stúlkunnar af verknaðinum.

Nauðgunin mun hafa staðið yfir í um eina klukkustund og leitaði stúlkan á Neyðarmóttöku fyrir þolendur kynferðisofbeldis þar sem fundust á henni áverkar.

Lögreglan krafðist mánaðar áframhaldandi gæsluvarðhalds yfir fimmmenningunum sem voru úrskurðaðir í viku varðhald í síðustu viku en það rann út í dag. Dómari synjaði þeirri kröfu lögreglunnar á þeim grundvelli að það væri ekki nauðsynlegt með tilliti til almannahagsmuna. Lögreglan hefur kært úrskurðinn.

Drengirnir hafa allir neitað sök þó þeir hafi gengist við því að hafa haft samfarir við stúlkuna og segja það hafa verið með hennar vilja. Þeir eru á aldrinum sautján til nítján ára.