Mikilvægt að ná sáttum án þess að hrinda af stað verðbólgu

Sigmundur Davíð Gunnlaugsson forsætisráðherra segir mikilvægt að þjóðarsátt náist í kjarabaráttu lækna og kallar eftir skoðun Alþýðusambands Íslands (ASÍ) á háum launakröfum þeirra.  Læknar hafi dregist úr samanburðarstéttum á undanförnum árum og því þurfi að rétta hlut þeirra án þess að hrinda fram verðbólgu.  Þetta sagði hann í þættinum Reykjavík síðdegis á Bylgjunni í dag.

„Þá er spurningin, er hægt að ná einhvers konar þjóðarsátt um að rétta hlut þeirra að einhverju leyti án þess að það setja af stað skriðu sem setji í gang verðbólgu sem leiðir þá til þess að kjarabót allra gufi upp eða hverfi í í verðbólgubálinu,“ sagði Sigmundur.

„Það er svo mikilvægt að menn skoði heildarmyndina. Til að mynda að ASÍ komi líka að því að meta hversu mikil sátt geti orðið um það að rétta hlut ákveðinna hópa. Standa vörð um heilbrigðiskerfið sérstaklega,“ bætti hann við.

Gylfi Arnbjörnsson, forseti ASÍ, undrast þó þessa umleitan forsætisráðherra og telur hann horfa fram hjá eigin ábyrgð á stöðu mála. „Það þýðir ekki fyrir forsætisráðherra að benda á ASÍ í þeim efnum enda komum við ekki nálægt kröfugerð lækna eða samningaviðræðum þeirra,“ sagði Gylfi í samtali við fréttastofu.

Verkfall lækna á geðsviði og skurðlækningasviði Landspítalans hófst á miðnætti og stendur yfir í tvo sólarhringa. Bjarni Benediktsson fjármálaráðherra sagði kröfur læknar óraunhæfar, en farið er fram á hátt í fimmtíu prósenta launahækkun.

Sigmundur lýsti yfir þungum áhyggjum á stöðu mála en sagði ekki koma til greina að setja lög á verkfallið. „Við höfum ekki gert ráð fyrir því. Ekki eins og sakir standa,“ sagði hann að lokum.