Innlent

Mistök við myndræna framsetningu

Jón Hákon Halldórsson skrifar
Fylgi flokka samkvæmt skoðanakönnun sem gerð var 21. og 22. október.
Fylgi flokka samkvæmt skoðanakönnun sem gerð var 21. og 22. október.

Þau leiðu mistök voru gerð við myndræna framsetningu á frétt um fylgi stjórnmálaflokkanna á forsíðu Fréttablaðsins í dag að súlur í súluritinu passa ekki við fylgistölur.

Áréttað skal að tölurnar eru í samræmi við niðurstöður skoðanakönnunarinnar en hæðir súlnanna eru rangar. Beðist er velvirðingar á mistökunum sem urðu, en þau uppgötvuðust ekki fyrr en eftir að blaðið var farið í prentun.

Á myndinni sem fylgir þessari frétt eru súlur í súluritinu í samræmi við niðurstöður skoðanakönnunarinnar. Súlurit á mynd á rafrænni útgáfu Fréttablaðsins, sem finna má hér á Vísi er einnig rétt. Hér að neðan fylgir svo fréttin:

Framsókn tapar þrettán mönnum
Framsóknarflokkurinn fær 8,7 prósenta fylgi í skoðanakönnun Fréttablaðsins sem gerð var dagana 21. og 22. október.

Yrði þetta niðurstaða kosninganna fengi flokkurinn sex þingmenn kjörna en hann fékk kjörna nítján þingmenn í síðustu kosningum.

Sjálfstæðisflokkurinn er stærsti flokkurinn á Alþingi miðað við þessar niðurstöður. Hann er með 30,3 prósent fylgi og fengi tuttugu þingmenn kjörna, en Samfylkingin er næststærst með 23,1 prósent fylgi.

Grétar Þór Eyþórsson, prófessor í stjórnmálafræði við Háskólann á Akureyri, segir að þetta sé lélegasta mæling sem Framsóknarflokkurinn hafi fengið frá kosningum. Hugsanlega sé komin óþreyja í menn að fá skuldaleiðréttingarnar upp úr hattinum og því sé ekki að neita að umræðan um skuldaleiðréttinguna hafi verið neikvæð. Sigrún Magnúsdóttir, þingmaður Framsóknarflokksins, segir að flokkurinn hafi ákveðið að láta verk sín tala og dvelja ekki við skoðanakannanir.

„Mér finnst ótrúlega margt hafa gerst og merki sjást um bættan þjóðarhag á mörgum sviðum. Hér er lítið atvinnuleysi og ekki verið meiri kaupmáttaraukning lengi, jafnvel kannski ekki í sögunni,“ segir Sigrún. Hún segir að hugsanlega hafi framsóknarmenn ekki náð að koma skilaboðum áleiðis um allt það jákvæða sem gert hefur verið að undanförnu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.