Lögreglumaður biður um traust

Óskar Þór Guðmundsson hefur starfað sem lögreglumaður í fimmtán ár. Hann telur umræðuna um aukið vopnabú lögreglunnar á villigötum. Lögregla hafi ætíð haft aðgang að skotvopnum og öðrum vopnum og sárnar honum umræðan þegar fólk lætur í veðri vaka að verið sé að afhenda ótýndum glæpamönnum vopn í hendur.

Óskar birti því einlægan pistil á Facebook sem vakið hefur mikla athygli þar sem hann biður fólk um að treysta sér – allar hans ákvarðanir séu og verði alltaf teknar með hagmuni og velferð annarra í húfi.

„Ég hef lent í ýmsu á þessum 15 árum og mörg af erfiðustu málunum hef ég verið að glíma við á meðan þú og fjölskylda þín voruð í fasta svefni. Ég hef þurft að taka erfiðar ákvarðanir sem gátu haft áhrif á framtíð mína og fjölskyldu minnar því allt sem ég geri til að vernda þig og þína ber ég ábyrgð á sjálfur,“ skrifar Óskar sem gaf Vísi góðfúslegt leyfi til birtingar pistilsins.

„Það er ákvörðun okkar sem samfélags hvort við ætlumst til að lögreglan stöðvi hættulega, vopnaða einstaklinga eða ekki. Ef þú hefur þá skoðun að það eigi hún ekki að gera þá mun ég virða það við þig því þín skoðun er alveg jafn mikilvæg fyrir samfélagið okkar og mín,“ bætir hann við og biður fólk um að færa rök fram án sleggjudóma svo umræðan verði samfélaginu til framdráttar.



Pistil Óskars má sjá í heild sinni hér fyrir neðan.

Eins og þú veist þá er ég starfandi lögreglumaður og hef verið það síðastliðin 15 ár. Allan þann tíma hef ég haft aðgang að skotvopnum og annarskonar vopnum til að hjálpa mér við að tryggja öryggi þitt og fjölskyldu þinnar ef öryggi ykkar er ógnað. Þar sem ég hef ekki orðið uppvís að því að drepa saklausa borgara þessa lands á þessum árum þrátt fyrir aðgang minn að þessum vopnum þá geng ég út frá því að það sé hægt að treysta mér fyrir þeim. Mér sárnar umræða þar sem fólk lætur í veðri vaka að verið sé að rétta ótýndum glæpamönnum vopn í hendur þegar rætt er um vopnaeign lögreglunnar.

Ég vil árétta við þig kæri vinur að ég hef ekki hugsað mér að taka nokkurn mann af lífi núna frekar en hingað til.

Ég hef lent í ýmsu á þessum 15 árum og mörg af erfiðustu málunum hef ég verið að glíma við á meðan þú og fjölskylda þín voruð í fasta svefni. Ég hef þurft að taka erfiðar ákvarðanir sem gátu haft áhrif á framtíð mína og fjölskyldu minnar því allt sem ég geri til að vernda þig og þína ber ég ábyrgð á sjálfur. Í öll skiptin sem ég hef staðið frammi fyrir erfiðum ákvörðunum hef ég tekið þá afstöðu að setja velferð þína og fjölskyldu þinnar framar mínum hagsmunum og ég vona að þú virðir það við mig. Það sem gerir mér svolítið erfitt fyrir í umræðu um þessi mál er að þú veist ekki af flestum þessara mála og ég er bundinn trúnaði og má ekki ræða þau við þig.

Það er ákvörðun okkar sem samfélags hvort við ætlumst til að lögreglan stöðvi hættulega, vopnaða einstaklinga eða ekki. Ef þú hefur þá skoðun að það eigi hún ekki að gera þá mun ég virða það við þig því þín skoðun er alveg jafn mikilvæg fyrir samfélagið okkar og mín.

Vilt þú kæri facebook vinur vera svo vænn að ígrunda vel þessi mál áður en þú tekur afstöðu til þess hvort þú treystir mér eða ekki. Ef þú ákveður að ég sé ekki traustsins verður viltu þá vera svo vænn að setja rök þín fram án sleggjudóma svo umræðan megi vera samfélaginu okkar til framdráttar.

Þinn vinur Óskar Þór Guðmundsson, lögreglumaður 0109.