Fleiri íslensk börn með ofnæmi fyrir hnetum og kiwi

Íslensk börn eru í auknum mæli að greinast með ofnæmi fyrir fæðutegundum eins og kiwi og hnetum. Þetta segir ofnæmislæknir sem rannsakar nú fæðuofnæmi barna.

Umfangsmikil rannsókn á fæðuofnæmi barna fer nú fram á Barnaspítala Hringsins. Fyrst var fylgst með um 1300 börnum frá fæðingu til tveggja og hálfs árs aldurs og ítarlega farið yfir mataræði þeirra.

Enn er verið að vinna úr gögnunum sem söfnuðust en þau sýna að um þrjú prósent barna eru með fæðuofnæmi hér á landi.

„Það er heldur hærri prósenta heldur en var hérna fyrir tíu árum þegar það var gerð lítil rannsókn hér á landi. Þannig að hugsanlega er það að aukast hér,“ segir Sigurveig Sigurðardóttir ofnæmislæknir sem er ein þeirra sem sér um rannsóknina. „Við erum að sjá meira ofnæmi fyrir ofnæmisvökum sem við sáum ekki fyrir tíu árum síðan. Við erum farin að sjá meira af kasjúhnetum, við erum að sjá ofnæmi fyrir furuhnetum, jafnvel, eða kiwi.“ 

Nú eru börnin á aldrinum sex til átta ára og farin að mæta aftur á Barnaspítalann til að hægt sé að skoða þau enn á ný og safna frekari gögnum. Tilgangurinn með rannsókninni er að finna út hvað það er í umhverfinu og fæðunni sem gerir það að verkum að sumir fá ofnæmi en aðrir ekki. Sigurveig segir að nú séu aðeins kenningar um hvað valdi þessu.

„Til dæmis þetta með hreinlætiskenninguna, að við séum orðin alltof hrein og ekki útsetja okkur fyrir nógu miklum svona fjölbreytileika af flóru. Það eru alltaf stöðugt fleiri rannsóknir sem sýna að garnaflóran skipti mjög miklu máli. Við, með okkar svona vestræna lifnaðarhætti, gætum hugsanlega verið að hafa áhrif á það til dæmis með of miklum sykri eða of miklum rotvörnum eða sýklalyfjum í heildina“, segir Sigurveig.