Segir Halldór hafa snúið fullkomlega við blaðinu

„Í fyrsta lagi furða ég mig á því að formaður Sambands íslenskra sveitarfélaga skuli gagnrýna að opinber störf séu staðsett út á landi. Það finnst mér mjög undarleg nálgun,“ segir Höskuldur Þórhallsson, þingmaður Framsóknarflokksins og formaður Umhverfis- og samgöngunefndar.

Höskuldur segir í samtali við Vísi að hann furðist mjög gagnrýni þeirra Halldórs Halldórssonar og Júlíus Vífils Ingólfssonar, borgarfulltrúa Sjálfstæðisflokksins í Reykjavík, á flutning Fiskistofu til Akureyrar. Þeir lögðu í morgun fram ályktunartillögu á fundi borgarstjórnar þar sem stjórnvöld eru hvött til að falla frá flutningi stofnunarinnar.

„Í annan stað furða ég mig á því að maður sem talaði mjög lengi fyrir þeim halla sem er varðandi opinber störf út á landsbyggðinni, hafi algerlega snúið við blaðinu í þeim efnum.“

Þá bendir Höskuldur á að gagnrýni Halldórs og Júlíus Vífils beinist einnig að þeirra eigin flokki, þar sem þessi ákvörðun hafi verið tekin í ríkisstjórn Sjálfstæðisflokksins og Framsóknarflokksins.

Gegn eigin flokki

Í tillögu Halldórs og Júlíusar segir að ákvörðunin um flutning stofnunarinnar sé dæmi um óundirbúin og óvandaðan flutning stonfunar. Varðandi það bendir Höskuldur á að eftir að ákvörðunin um flutning Fiskistofu hafi verið tekin, hafi verið heiðarlegt af stjórnvöldum að stíga fram og segja strax frá áætlunum sínum.

„Það eru vönduð vinnubrögð. Það hefði verið óvandað ef það hefði verið pukrast með tilfærsluna eftir að ákvörðunin lá fyrir. Þetta var lang heiðarlegast í stöðunni,“ segir Höskuldur.

Ályktunartillaga Halldórs og Júlíusar kemur einnig inn á stofnun nýrrar húsnæðismálastofnunar og segja þeir hana ekki eiga erindi út á land. Mest þörf slíkrar stofnuna sé í Reykjavík.

„Jafnvel sveitarstjórnarmenn í Reykjavík hljóta að átta sig á því að nýjar stofnanir, eins og Húsnæðismálastofnunin sem að til stendur að setja á laggirnar, geta vel þjónað hlutverki sínu með góðum hætti þó þær séu ekki staddar í Reykjavík, eins og lang flestar aðrar stofnanir landsins,“ segir Höskuldur. Hann telur fjölda stofnana úti á landi líklega mega telja á fingrum beggja handa.

„Þeim fækkar stöðugt þeim opinberu störfum sem þar er að finna. Þegar menn reyna að spyrna við hljóta jafnvel fulltrúar í borgarstjórn Reykjavíkur að átta sig á því.“