Lögreglan óskar eftir vitnum að líkamsárás

Lögreglan á höfuðborgarsvæðinu óskar eftir vitnum að líkamsárás sem átti sér stað á móts við safnaðarheimili Dómkirkjunnar í Lækjargötu 14a í Reykjavík aðfaranótt sunnudagsins 28. september, en tilkynning um árásina barst lögreglu kl. 3.32.

Þar var ráðist á fertugan karlmann og leitar lögreglan þriggja manna í tengslum við rannsóknina.

Þeir eru allir taldir vera á þrítugsaldri og voru dökkklæddir umrædda nótt. Einn er ljóshærður og var í svartri hettupeysu, en annar, lágvaxnari en hinir, var með gleraugu með svartri umgjörð. Sá var enn fremur með húfu á höfði.

Þeir sem kunna að hafa orðið vitni að árásinni, eða geta veitt upplýsingar um málið að öðru leyti, eru vinsamlegast beðnir um að hafa samband við lögregluna í síma 444-1000. Upplýsingum má enn fremur koma á framfæri í tölvupósti á netfangið gudmundur.haukur@lrh.is eða í einkaskilaboðum á fésbókarsíðu Lögreglunnar á höfuðborgarsvæðinu.