Utanríkisráðherra mótmælti hernaði Ísraelsmanna á Gaza

Himinn og haf er milli utanríkisstefnu Íslands gagnvart Palestínu annars vegar og stefnu stjórnvalda í Ísrael hins vegar, að sögn utanríkisráðherra sem fundaði með ísraelskum starfsbróður sínum á allsherjarþingi Sameinuðu þjóðanna.

Gunnar Bragi Sveinsson utanríkisráðherra sagði hersetu og mannréttindabrot ísraelskra stjórnvalda í Palestínu dæmi um virðingarleysi fyrir alþjóðalögum í ræðu sinni á allsherjarþingi Sameinuðu þjóðanna á mánudag . Tilgangslaust stríð á Gaza síðastliðið sumar hefði kostað fjölda mannslífa. Hann fordæmdi eldflaugaárásir Hamas á Ísrael og valdbeitingu Ísraelshers og sagði  að hernámi Ísraela í Palestínu yrði að ljúka. Lausn vandans fælist í tveggja ríkja lausninni með víðtækum stuðningi grannríkjanna og öflugu friðargæsluliði.

Gunnar Bragi átti síðan fund með Avigdor Lieberman utanríkisráðherra Ísraels á allsherjarþinginu í New York og segir fundinn hafa verið hreinskiptinn.

„Við ræddum um málefni Gaza að sjálfsögðu og við lýstum yfir miklum vonbrigðum með hvernig Ísraelsmenn tóku á þessu vandamáli þar. Við komum því auðvitað líka á framfæri  að við værum gagnrýnin á hvernig Hamas hefði haldið á sínum málum. En við bentum á að við myndum aldrei sætta okkur við að saklausir borgarar væru felldir eða strádrepnir með þeim hætti sem þarna gerðist,“ segir Gunnar Bragi.

Utanríkisráðherra segist hafa ítrekað að Ísraelsmenn yrðu að fara fram með hófsömum hætti í samskiptum sínum við Palestínumenn. Lieberman er hins vegar í röðum mestu harðlínumanna í ísraelskum stjórnmálum og hefur verið talsmaður þess að engin miskun væri sýnd í hernaði gegn Palestínumönnum og hann vildi gjarnan leggja allt land Palestínumanna undir Ísrael.

Ísraelsmenn svara gjarnan hörkulega fyrir sig. Var þér kannski vinsamlega bent á það að litla Ísland hefði lítið vit á þessum málum og ætti ekki að skipta sér af?

„Við skulum segja að það séu himinn og haf á milli hugmynda okkar utanríkisráðherranna um það hvernig þetta mál er tilkomið og hvernig eigi að leysa það,“ segir Gunnar Bragi Sveinsson.