Vesturbæingar flykkjast í sund

Á sex mánaða tímabili jókst aðsókn í Vesturbæjarlauginni um 27.000 gesti samanborið við tölur frá árinu áður. Um er að ræða tímabilið frá apríl – september en laugin var tekinn í gegn fyrr á árinu. Miklar endurbætur voru gerðar og settur upp nýr heitur pottur.

Vesturbæjarlaugin, sem er ein elsta laug Reykjavíkur, hafði lengið setið á hakanum í viðhaldi og endurbótum. Aðsóknartölurnar eru til marks um Vesturbæingar og aðrir Reykvíkingar séu ánægðir með endurbætur í lauginni.

„Ég er gríðarlega stolt af endurbótum í Vesturbæjarlaug, við í lögðum þetta til vegna þess að það þurfti að koma til móts við barnafólk í Vesturbæ og sólþyrsta Reykvíkinga sem höfðu lengi flúið í nærliggjandi sveitarfélög einkum Neslaugina,“ segir Eva H. Baldursdóttir, fulltrúi ÍTR og varaborgarfulltrúi. 

„Vesturbæingar hljóta að vera ánægðir með framtakið, ef marka má aðsóknartölurnar en ég hef sjálf hitt fólk í pottinum og allir eru á einu máli um að vel hafi tekist til.“

Eva segir að potturinn sé kærkomin viðbót, enda sé hann eini potturinn í Reykjavík sem hafi farið í umsagnarferli íbúanna. 

„Það umsagnarferli skilaði góðum athugasemdum sem var tekið mark á og þær bættu framkvæmdina verulega.“

Á umræddu tímabili sóttu 127.561 manns laugina árið 2013 en 154.059 á árinu 2014. Þetta mun vera 20% aukning.