„Það leiðinlega við þetta er í raun að vera niðurlægður svona og það út af kynþætti“

„Ég lendi í „handahófskenndri leit“ í fjórum af hverjum fimm skiptum sem ég ferðast, bæði á flugvellinum hér heima og erlendis,“ segir Alexander Jarl Abu-Samrah. Móðir Alexanders Jarls er íslensk en faðir hans er palestínskur og er búsettur í Bandaríkjunum.

„Það leiðinlega við þetta er í raun að vera niðurlægður svona og það út af kynþætti,“ bætir hann við.

Í síðustu viku ferðaðist Alexander til föður síns til Minneapolis í Bandaríkjunum. Við komuna til Bandaríkjanna var hann færður til yfirheyrslu, þar sem hann var þráspurður hvað hann ætlaði sér að gera í Bandaríkjunum.

Þakkar Gunnari Nelson

Alexander skrifaði um málið á Facebook-síðu sinni. Þar lýsir hann samskiptum sín við bandarískan landamæravörð. Vörðurinn spurði Alexander hvað hann ætlaði að gera í Bandaríkjunum. Alexander sagðist vera að heimsækja föður sinn og spurði vörðurinn um uppruna hans. Þegar Alexander tjáði verðinum að faðir hans væri frá Palestínu var hann færður til yfirheyrslu.

„Við förum inn í herbergi og hann heldur áfram með spurningarnar. Hvert einasta orð sem ég segi styrkir hans trú um að ég ætli mér að búa ólöglega í landinu hans. Eftir tvo klukkutíma af honum að setja saman ástæður til að henda mér úr landi, þá spyr hann mig hvað ég geri í frítíma mínum og ég segi honum að ég æfi Jiu-jitsu.“ 

Alexander segir að þarna hafi viðmót landamæravarðarins breyst. „Hann spyr hvort ég æfi í Meh-joll-neer [Mjölni]. Eftir 10 mínútna spjall um Gunna Nelson og donkey guard, ákveður hann að hleypa mér inn í landið,“ útskýrir hann og þakkar Gunnari Nelson sérstaklega fyrir.

Ekki í fyrsta skiptið

Alexander er iðulega stöðvaður og spurður út í ferðalög sín á flugvöllum og rekur það til eftirnafns síns. Alexander Jarl, sem hefur verið iðinn við að semja rapptónlist undanfarin ár ferðaðist þá til Bandaríkjanna til þess að leika tónlist sína fyrir Bandaríkjamenn.

„2011 fór ég í tónleikaferðalag til New York. Ég man ekki hvort leitað var á mér á flugvellinum heima en landamæraverðirnir úti tóku mig um leið og þeir sáu eftirnafnið, en stúlkan sem ég ferðaðist með fór beint í gegn,“ rifjar hann upp og heldur áfram:

„Ég var sendur inn í herbergi með rúmlega tuttugu einstaklingum sem litu út alveg eins og ég. Brúnir, með skegg og á tvítugsaldri. Eftir 45 mínútna bið er ég tekinn inn í yfirheyrsluherbergi. Tveir menn, báðir með skammbyssur í beltinu, spyrja mig að fáránlegustu hlutunum. Ein furðulegasta spurningin var hvað bílnúmerið hjá þáverandi tengdamóður minni væri.“ Að lokum var honum þó hleypt í gegn, eftir tveggja klukkustunda yfirheyrslur.

Honum þykir leiðinlegt að vera niðurlægður útaf kynþætti sínum, en segist ekki hafa orðið hræddur í þessum yfirheyrslum. „Það versta sem þeir geta gert við mig er að senda mig aftur heim á klakann.“

Faðir Alexanders rekur heildverslun í Bandaríkjunum og hefur gert það í um tvo áratugi. Alexander er nú á heimleið, eftir um viku dvöl í Bandaríkjunum.