Byrjaði snemma og ætlar að hætta snemma

Guðmundur Reynir Gunnarsson, nýkrýndur bikarmeistari með KR í knattspyrnu, hefur ákveðið að leggja skóna á hilluna í lok tímabils. Vinstri bakvörðurinn er aðeins 25 ára gamall.

„Ég byrjaði mjög snemma í þessu og ætla að hætta snemma líka,“ segir Vesturbæingurinn í svari sínu til vina og kunningja á Facebook í kvöld. Guðmundur Reynir, sem vann sinn sjötta stóra titil með KR í gær er liðið lagði Keflavík 2-1 í úrslitum Borgunarbikarsins, segir kominn tíma á eitthvað nýtt.

„Það er mikil skuldbinding sem fylgir fótboltanum og þegar hún er ekki lengur til staðar þá opnast aðrar dyr.“

Guðmudur Reynir spilaði sinn 250. leik fyrir uppeldisfélag sitt í gær og er níundi leikjahæsti KR-ingurinn frá upphafi. Hann hefur ekki aðeins vakið athygli fyrir frammistöðu sína á vellinum heldur hefur einnig fyrir yfirburða námsgetu auk þess að vera tónlistarmaður.

Hér að neðan má hlusta á lag hans „I don't know“ en Guðmundur Reynir styðst við gælunafnið sitt, Mummi, þegar kemur að tónlistinni.