Kominn tími á að endurskoða reglur um blóðgjafir

Lögsögumaður Evrópudómstólsins dregur í efa að réttmætt sé að banna karlmönnum, sem stunda kynlíf með sama kyni, að gefa blóð. Lögfræðingur segir að það sé tími til kominn að endurskoða reglur um blóðgjafir hér á landi. 

Í júlí síðastliðnum gaf lögsögumaður Evrópudómstólsins álit í máli fransks karlmanns sem var synjað um að gefa blóð vegna kynhneigðar sinnar. Þar kemur fram að kynhegðun ein og sér réttlæti ekki útskúfun ákveðins hóps frá því að gefa blóð. Hjördís Birna Hjartardóttir, lögfræðingur, segir að álitið gefi vísbendingu um að bannið standist ekki skoðun.

„Þessi tiltekna máli er ekki lokið en þetta er mjög sterk vísbending um hvernig því mun ljúka. Það auðvitað styrkir okkur í þeirri trú að þetta bann standist ekki, hvorki læknis- né lögfræðilega,“ segir hún.

Átján ára gamall samkynhneigður karlmaður lagði árið 2011 fram stjórnsýslukæru vegna ákvörðunar blóðbankans um að meina honum að gefa blóð.

Landspítali andmælti kærunni og vísaði sérstaklega í dóm þar sem blóð er flokkað sem vara, og samkvæmt honum ættu allir rétt á að fá eins örugga vöru og mögulegt sé. Óörugg vara, líkt og blóð samkynhneigðra manna yrði að teljast gölluð.

Hjördís var ein lögmanna mannsins. Hún segir að tímabært sé að endurskoða reglur um blóðgjafir hér á landi eins og gert hefur verið í nágrannalöndum okkar. 

„Jafnvel þó að niðurstaðan væri sú að þessi hópur væri í aukinni áhættu þá gengur bannið einfaldlega of langt. Lönd eins og Finnland, Svíþjóð og Bretland eru allt lönd sem hafa fallið frá þessu fortakslausa banni. Það er kominn tími á að reglurnar verði endurskoðaðar hér líka“.